Cabesante di EPB-Oranjestad Erwin Lopez:
- Reaccion riba loke a socede siman pasa na e scol
- Na scol EPB ta un grupo masha chikito ta duna basta problema
ORANJESTAD (AAN)- Cabesante di EPB-Oranjestad, señor Erwin Lopez, a yama un conferencia di prensa, diabierna ultimo, unda el a duna un splicacion tocante kico a tuma lugar siman pasa na scol y tambe pa reacciona riba loke a sali publica den prensa.
Señor Lopez a bisa cu manera a sali den prensa tin hopi problema na e scol, specialmente pafo. Na EPB- Oranjestad, nan ta haya alumnonan di tur bario y di diferente scol. Durante e dos prome añanan, nan ta duna e studiantenan educacion general, y e siguiente dos añanan e hobennan ta haya educacion profesional.
“E meta di nos scol ta pa cada alumno cu caba sa un profesion of ofishi pa asina por sigui studia na Colegio EPI (Educacion Profesional Intermedio), of si e kier bay traha, haya un bon trabao.
Tambe nos ta enfoca hopi riba norma y balornan, pa nos alumnonan ora nan caba EPB ta bon personanan den nos sociedad.
Na scol EPB nos tin mil alumno, di cual un grupo hopi chikito ta duna nos dolor di cabes”, Cabesante señor Lopez a expresa.
El agrega cu EPB Oranjestad tur aña ta conduci mas cu 200 alumno pa gradua, y ta bon educa y scol tin bon respuesta di e companianan den nos comunidad, cu ta bisa cu nos muchanan ta na un nivel hopi bon.
“Nos ta hopi gradici na nos docentenan pa esey y nos ta spera cu nan sigui haci esfuerzo pa nos eleva nos nivel di educacion tur dia”, el a manifesta.
“Kico ta pasando na Aruba y na EPB? Cabesante señor Erwin Lopez a puntra y alavez a splica cu na Aruba tin hopi gang den barionan, cu ta birando mas y mas agresivo y cu ta cana cu arma, y cu tin hopi problema social cu drenta cura di scol.
Como consecuencia, nos scol ta purba tur manera pa bringa esaki. Nos tin psicologo, trahador social, cu ta brinda ayudo na e muchanan aki, pero nos ta mira cu cada bez e problema ta bira mas grandi y ta escala, y ora cu nos ta search nos ta haya hopi arma. Nan no ta worde uza directamente riba cura di scol, pero ta duna un bista y un preocupacion grandi bao di nos mayornan, y nos trahadornan, nos docentenan”, señor Lopez a relata.
