Ola Tropical di fin di siman a sigui aleha bay pabao

ORANJESTAD (AAN):   Entre diabierna y diasabra, Aruba a wordo sorprendi cu basta awa cu a cay na diferente parti di e isla. 

Semper tin esnan cu ta yama e awaceronan aki bon bini ya cu pa hopi dia caba, tabata suplica pa esaki, mirando e calor intenso cu tabatin na Aruba.   E Ola Tropical aki a cubri un area for di parti zuid di Republica Dominicana bay te na parti nort di Venezuela.

   Cu e awacero aki,  e tera por a sinti e frescura di biaha y nunca no ta falta e alegria cu esaki ta trece pa nos muchanan, cu mesora ta sali hunga y disfruta di e dushi awacero aki. Na otro banda, tin e efectonan cu mal tempo ta trece cu ne ya cu por a mira tambe cu awa a para na cierto caminda y cu a trece algun daño. Tambe a tende di casnan cu a yena cu awa caminda e habitantenan mester a pidi ayudo di e autoridadnan.

   E tempo aki tabata tin di haber cu un ola tropical cu a efecta e region. Pa loke ta e proximo oranan, Departamento Meteorologico di Aruba a indica cu aire relativamente seco y stabiel a drenta region local y lo stroba desaroyo di nubianan cu por produci awacero. Pa e motibo aki no a spera yobida di importancia den ultimo oranan. Mas aleu por bisa cu un disturbio zwak lo pasa den region bay west durante comienso di siman y lo trece poco humedad den region.Esaki lo aumenta e chens pa awacero e ora ey.

   Pronostico di tempo pa proximo dianan: parcialmente nubla cu un awacero breve. Biento lo ta for di direccion oost te oost- zuidoost y modera te basta fuerte; posiblemente fuerte den rafaga. Temperatura maximo lo ta 32º C, y minimo lo ta 27º C awe.