CARACAS: E proceso di santificacion di e beato José Gregorio Hernández, e docter venezolano na cual centenares di milagro ta wordo atribui,
ta sigui avanza y cu noticianan positivo. Esaki a wordo divulga door di Cardinal di Misa Catolico na Venezuela, Baltazar Porras.
E di dos posible milagro cu ta bao consideracion awor a socede cu un venezolano biba na Miami, y tur prueba di esaki ya caba ta na Roma, segun e Cardinal a laga sa.
El a splica cu e proceso a tarda un poco debi na e traduccionnan cu mester a wordo haci di spaño pa ingles, y di ingles pa italiano. El a agrega cu den e siguiente simannan, nan ta sperando di por haya un contesta di e Comite di Vaticano cu ta encarga pa evalua e milagronan y di haci e investigacionnan medico.
E asina yama ‘Docter di Pobernan’, manera e ta conoci tambe, a logra beatificacion na April 2021 danki na e aprobacion duna door di Papa Francisco. Esaki a socede despues cu e Comision Medico di e Congregacion pa e Causanan di Santonan di Vaticano, a determina cu e prome milagro realmente tabata un hecho ‘inexplicable’.
Awor, pa por logra e canonizacion di Dr. José Gregorio Hernández tabata necesario pa presenta un otro milagro cu a socede despues di e beatificacion na 2021. Pa esey, a escoge e storia di un venezolano na Miami, kende tabatin djis algun dia so mas di bida pero e “Docter di Pobernan” a acudi na su yamada pa yudansa.
