Obesidad ta keda un malesa prevalente y di risico ora di haya Covid-19

Cifranan di HOH ta revela: --- ORANJESTAD (AAN): Un aspecto cu mester pone enfasis riba dje ora cu ta analisa kico tabata e situacion na Dr. Horario Oduber Hospital na momento cu e di 4 ola di Covid-19 a afecta Aruba ta cu entre tur e pashentnan di Covid-19,

cu mester a wordo interna, mas cu 80% tabata tin sobrepeso (pre-obesidad, obeso of cu obesidad morbido).

E grafico 1 ta ilustra e clasificacion di e pashentnan cu Covid-19 segun nan BMI (Body Mass Index, mayor of igual na 25) y por mira cu un 39.2% tabata den e grupo di Obeso (class I y II). 25.4% a cay den e grupo pre-obeso (BMI 25 - 30). Mientras cu 16.5% a cay den obesidad morbido (Class III). 

Den e grupo aki, e porcentahe di pashentnan vacuna ta di 72,4% compara cu 84,2% di e grupo di pashentnan no vacuna.

31.9% di pashentnan vacuna tabata tin pre-obesidad (BMI 25 -30), 30,4% a cay den e grupo obeso (class I y II). Cu peso normal, 26,1% y cu obesidad morbido un 10.1%.

Pa loke ta trata esnan no vacuna, 42.4% tabata obeso, 23,0% tabata pre-obeso y 18.8% tabata tin obesidad morbido.

Esaki ta cifranan cu Dr. Horacio Oduber a comparti den un documento cu yama 'Comorbiditeit Covid-19 patiënten 4e golf'.

Ora cu a bay check e categoria di fayecimentonan por a constata cu solamente den 5,4% di e casonan no tabata tin comorbilidad (malesanan pre-existente of cronico), 66% di e casonan tabata tin dos of mas comorbilidad.

Den comparacion cu e grupo completo di pashentnan di Covid-19, e porcentahenan pa categoria di comorbilidad ta mas halto, esaki ta specialmente den loke ta presion halto (hipertension) y  malesa di curason y, den menor porcentahe, diabetes mellitus.

Segun porcentahe, e malesanan cu ta prevalece den esnan cu a fayece ta: obesidad (73,3%), Presion halto (58,9%), diabetes mellitus (42.9%), malesa di curason (28,6%), malesa cronico di riñon (23.2%), cancer (10.7% y pulmon (3,6%).

Di 327 cu a wordo interna na HOH cu Covid-19 den e periodo di 1 di Juli te cu 5 di October 2021, 56 a fayece. 43 pashent a muri na hospital y 13 na un hospital na Colombia.