Frontera a wordo cera pa e 'anti-vaxxers' --- ORANJESTAD (AAN): Entrante dialuna awor, 8 di November, ta drenta na vigor e medidanan nobo a impone pa loke ta entrada di turistanan.
E gobierno mericano a anuncia recientemente cu dialuna 8 di November 2021, ta bay prohibi e ingreso di personanan cu no a completa nan sistema di vacunacion cu alomenos 2 siman previo di e dia di entrada na Merca.
E arubianonan of residentenan, cu 'visa waiver' of visa mericano, lo mester tin un certificado di vacunacion y codigo QR cu lo wordo exigi prome cu aborda e avion den mayoria di e casonan.
Ainda Departamento di Salud na Aruba no a emiti un comunicado di prensa riba e tema aki, pero locual si DIARIO por a confirma pa medio di e vocero di DVG ta cu tur esnan cu ta viaha pa Merca mester tin nan certificado di vacunacion, cual a haya via e Aruba Health App ora cu a vacuna completamente, cu e dos dosisnan di e vacuna Pfizer.
Otro siman, lo tin mas informacion relaciona cu e proceso aki pa esnan cu tin pensa di viaha pa Merca den e dianan benidero of den e proximo lunanan.
Locual si ta bon cla den e caso aki ta cu Merca a cera su frontera pa e personanan cu no a vacuna of e asina yama 'anti-vaxxers' (anti-vacuna).
E certificado di vacunacion contra Covid-19 ta obligatorio pa tur pasahero cu no ta ciudadano mericano ni imigrante y ta yega Merca for di stranhero den avion.
Pa awor, e pasaheronan cu ta viaha den avion di 2 aña di edad of mas, ciudadano of no, of vacuna of no vacuna, mester presenta tambe un resultado negativo di e prueba viral di deteccion di COVID-19 of un certificado di recuperacion di COVID-19 pa por aborda un vuelo pa Merca.
Esaki ta e vacunanan contra Covid-19 acepta pa Merca:
Dosis unico: Janssen/J&J (aproba of autorisa pa FDA y pa Organisacion Mundial di Salud, WHO).
Dos dosis: Pfizer - BioNTech y Moderna (aproba of autorisa pa FDA y WHO pa uso di emergencia).
Ademas di AstraZeneca, Covishield, BIBP/Sinopharm y Sinovac (aproba pa WHO pa uso di emergencia).
Riba un grafico adhunto, por mira e descripcion relaciona cu e comprobante di vacunacion contra Covid-19.
Tur e comprobantenan di vacunacion contra COVID-19 mester tin:
- Identificadornan personal (nomber completo y fecha di nacimento) cu ta coincidi cu e datonan di e pasport of otro documentacion di viahe di e pasahero.
- Nomber di e agencia oficial cu ta emiti e registro (manera ministerio di salud publico de e caso di Aruba, di gobierno of otro proveedor di vacunanan autoriza).
- Fabricante di e vacuna y fechanan di vacunacion.
