OAA lo traha hunto cu Scol ROVC di Hulanda

Minister Endy Croes a splica: ORANJESTAD (AAN) – Minister di Enseñanza, señor Endy Croes,

a duna di conoce cu OAA ta bay cuminza cu dos opleiding. Un cu ta Hulp Electromonteur nivel 2, cu ta un programa di ROVC (Regional Opleiding en Vorming Centrum), situa na Eiden, cu ta un instituto cu e mandatario mes a bishita na Maart ultimo, durante e reunion entre e cuater ministernan di Enseñanza di Reino.

            E mandatario a expresa cu ROVC ta un scol masha bunita, di e mesun tipo cu e kier desaroya OAA, aunke logicamente na Hulanda ta mucho mas grandi. Cu e concepto aki, nan curriculum, y e dirigencia di nan ayudo, diferente di e opleidingnan lo wordo duna. ROVC su diplomanan ta reconoci riba nivel MBO.

E otro opleiding cu lo inicia ta un opleiding “Hulpkoelmonteur”, tambe nivel 2, cu ta un programa di ROVC, cu lo support OAA den e trayecto aki.

            “E leerwerktraject tambe nos lo ranca sali cune entre 12 cu 18 di September, cu ta e ‘target line’. Nos a wordo presenta full un draaiboek pa esnan encarga, y tin hopi fecha critico mara na cada aspecto, pa asina nos cumpli cu e parti aki, pa finalmente nos por inicia cu e opleidingnan di OAA”, e mandatario a señala, agregando cu awo ta mas leu y e ta sinti su mes mas confortable, y manera semper e sa bisa, ora tin algo completamente forma, ta momento pa sali bin afo cune.

            E mandatario a agrega cu e Leerwerktraject ta un duracion di un aña, y e ta wordo hopi pidi. E opleidingnan aki lo cuminza hunto. Akinan tin cuater opleiding nivel 1 cu ta di conocementonan basico di automonteur, onderhoudsmonteur, commercieel medewerker.

            Minister Endy Croes a agrega cu na Februari lo amplia e cantidad di opleidingnan pa asina por ta miho prepara. Via ROVC y trahando hunto cu nan, por ehemplo, na Hulanda, e companianan cu ta duna servicio na airconan na cas of empresanan grandi, tur tin cu pasa den e sistema aki y esey lo sosode na Aruba tambe. 

Esnan cu ta haci e trabao aki mester bay e opleidingnan banda di trabao y nan lo haya certificado, a base di un carnet y den futuro, e koelmonteur cu ta bin drecha airco na un cas mester tin su badge cu por mira cu el a pasa door di les y cu tin un curriculum pa esaki, y aki ta na unda kier yega cu e opleidingnan aki na OAA.