Fundacion HIAS tambe lo ta participando awe na Marshe Rancho

Xinara Raymond contento cu nan participacion

ORANJESTAD (AAN): Awe Diahuebs lo tuma lugar e actividad yama ‘Marshe Rancho’.

   Esaki lo ta un actividad cultural di mercado cu lo ta for di 4:00 pm te cu 7:00 pm.  Ademas di Walking Tour di Rancho, lo tin cuminda, y tambe stands special pa asina duna un man na comunidad en general.

   Claro cu lo bay tin dunamento extenso di informacion, y e organizacion CEDEHM lo ta encarga cu e coordinacion di esey.

   Un di e organizacionnan cu lo participa tambe na e Marshe Rancho aki, ta e sede local di HIAS Aruba.

   Xinara Raymond, kende ta un oficial di proteccion di Fundacion HIAS.  HIAS ta un organizacion mundial cu ta proteha hendenan di cual nan bida ta den peligro, djis pasobra nan por ta refugiado, of a haya nan obliga di huy for di nan pais.

   Segun Xinara Raymond, HIAS a wordo acerca door di CEDEHM pa bin participa den Marshe Rancho.  Esey e ora lo bira nan prome participacion, y claro nan tambe kier forma parti di un actividad sumamente bunita y alavez importante.

   Ta esencial pa na Aruba tur hende sa di su cultura y di su historia, y e lugar di mas bunita pa esaki socede ta na Rancho.  Fundacion HIAS ta haya importante pa participantenan sinti nan mes acepta door di comunidad Arubiano, pa nan sinti cu nan tambe ta forma parti di comunidad, y esey ta un di e pilarnan tambe di intergacion.

   Pues na e momento cu a wordo acerca pa forma parti di Marshe Rancho, nan a acepta inmediatamente.  Fundacion HIAS ta sinti cu aki nan participantenan por siña un tiki mas di e cultura di Aruba, e historia di e isla, y forma parti di algo cu ya caba ta existi, algo cu ta floreciendo y algo cu tin su proposito y su metanan cu tambe ta cuadra cu e metanan di HIAS Aruba.

   Ademas Xinara Raymond a subraya cu nan semper ta habri pa colaboracion cu entidadnan tercero, y aki a haci esey cu Stichting Rancho y tambe cu CEDEHM, unda tur lo trece dilanti e esencia di e organizacion di Fundacion Rancho y e asisti na algo cu ta e Marshe Rancho.

   El a bisa cu nan participantenan lo bay tey presente, lo tin bendemento di cuminda, pasapalo, arroz con pollo, soppi, y tur hende ta bon bini net pafo di e sede di Fundacion Rancho, unda alavez lo tin musica cu yen ambiente.