‘Nos ta para cu Merca y nos ta para cu humanidad’

Premier Eman na ceremonia di conmemoracion pa e fecha di 9/11:

ORANJESTAD (AAN): Prome Minister Mike Eman a participa diabierna mainta na e ceremonia anual di conmemoracion di 11 di September, cu a tuma luga na U.S. Customs and Border Protection (CBP) na Aeropuerto Internacional Reina Beatrix.

   E ceremonia ta un momento anual di reflexion riba e atentadonan di 11 di september 2001, pa honra memoria di e victimanan y reconoce e homber y muhenan cu a pone nan propio bida na riesgo pa salba otro.

   Durante e ceremonia, Premier Eman a comparti cu personalmente e fecha aki tin un significado profundo. Su señora cu ta di Merca y e recuerdo di e momentonan di 11 di september 2001 ainda ta cla den su memoria.

   Premier a recorda con nan a mira riba television cu un di e torennan ya tabata impacta y, mientras nan tabata siguiendo e acontecimentonan, nan a presencia e momento cu e segundo avion a dal e otro toren.

“E impacto, e tristesa y e dolor cu ta bay cu e dia ey, nunca bo ta lubida,” Premier Eman a expresa.

Eman a splica cu durante su periodonan como Prome Minister, el a sigura di ta presente na e conmemoracion aki. Pa Aruba, e presencia Mericano na aeropuerto ta representa un conexion special cu Merca, y riba un fecha manera 11 di september e conexion ey ta haya ainda mas significado.

   “Door di ta aki, nos ta para cu Merca y nos ta para cu humanidad,” Premier Eman a expresa.

   Premier Eman a recorda cu e consecuencia di 9/11 no a limita na e enorme tragedia humano. E acontecimentonan a causa un impacto mundial riba aviacion y, consecuentemente, un preocupacion serio pa economia di Aruba, un isla cu ta depende fuertemente di conectividad aerea y turismo.

   Segun Premier, den e periodo dificil ey liderazgo tabata crucial pa evita cu Aruba su conectividad cu mercado Mericano para completamente. El a recorda e esfuerso haci na e tempo ey door di su defunto ruman homber grandi Henny Eman, Prome Minister di pais Aruba e tempo ey, pa mantene vuelonan pa Aruba activo, algo cu posteriormente a contribui na recuperacion di e sector turistico.

   Pa Premier Eman, e experiencia ta demonstra cu den momentonan di crisis, solidaridad, cooperacion y liderazgo por haci un diferencia importante.

   Honra esnan cu a perde nan bida y esnan cu a sirbi: E punto central di e ceremonia a keda memoria di e victimanan y reconocimento na tur esnan cu a actua cu curashi durante e tragedia.

   Premier Eman a haci referencia special na e first responders cu, mientras otro tabata tratando di sali for di e torennan, a subi e trapinan pa yuda y salba bida.  E conmemoracion a termina cu un mensahe di solidaridad cu e famianan cu a perde un ser keri, cu esnan cu a sirbi durante y despues di e atentadonan, y cu pueblo Mericano.

   Ainda 25 aña despues, Aruba ta sigui recorda e victimanan di 9/11 y honra e curashi y sacrificio di tur esnan cu a responde den un di e momentonan mas doloroso den historia Mericano.