Nobentitres porciento di studiante di EPB San Nicolas a gradua

Director Gregory Mathilda hopi contento:

*Un resultado fantastico! 

ORANJESTAD (AAN) – Director di EPB San Nicolas, señor Gregory Mathilda, a duna di conoce cu e aña aki e resultado escolar ta fantastico.

“E aña aki nos ta masha, masha orguyoso di nos studiantenan, pasobra nos a logra un average completo di scol cu ta 93%, cu ta 212 studiante cu a gradua awe nochi, y esey ta e motibo pakico nos ta celebra asina grandi”, Meneer Mathilda a señala.

            El a duna di conoce cu e studiantenan aki a gradua den tur sector. E graduadonan aki por traha of sigui studia na Colegio EPI, locual logicamente ta keda nan escogencia, Meneer Mathilda a señala. Tin di nan ta bay Hulanda y otronan cu algun empresa a pidi nan pa drenta den servicio.

“Nos ta hopi orguyoso di nan, pasobra nan tur a pasa cu exito nan pasantia, y nos ta mira e resultado positivo y bunita aki”, director di EPB San Nicolas a reitera.

            El a subraya cu aparte di e resultado, e respet y disciplina (bon manera) nan mester eherce  y esaki ta e parti mas esencial cu e scol ta siña nan hobennan tur dia: disciplina, norma y balornan. Cu 212 alumno a gradua, loke ta nifica 93%, ta un logro hopi bunita, meneer Gregory Mathilda a remarca.