Miami Soccer Academy a pidi team Aruba pa wega di fogeo awemainta  

MiamiCup 2024

MIAMI: Manera cu DIARIO a trece den su edicion di Diahuebs caba, riba Diaranson e ekipo di ASA Elite Sub-12 a habri mainta keto bay como un team invicto.  E prome wega di Diaranson nan a gana e team ‘Formando Campeones Academia de Futbol” di Republica Dominicana cu score di 2-0.

   Sinembargo den semi-final, nan a perde di e team di Honduras cu score di 2-0.  Aki Aruba a perde su invicto, y su chens di defende Grupo A pa e final den Sub-12.

   Aruba a gana tres wega na forma triunfante, pero a djis perde uno.

   Aunke e derota aki a cay duro pa e hobennan futbolista di Aruba, toch loke a sigui despues tabata loke a haci nan curazon tiki contento.  Esey ta e monton di reaccion di varios otro Coach di otro paisnan cu a bin trece dilanti, con impresiona nan a keda cu e forma yen stamina y control total cu Aruba ta hunga riba veld.

   Tambe nan a pidi pa pose hunto riba potret cu team ASA Elite Aruba.  Nan a admiti cu na comienso nan a kere cu e team di Aruba no tabata fuerte, pero ora cu nan a gana den prome wega cu 10-0, mesora nan a bin realiza cu e isla tin un team basta potente den Sub-12.

   Riba Diahuebs, un coach di team di Republica Dominicana a solicita ASA Elite Aruba pa nan tene un wega di fogeo riba Diahuebs mes.  Despues coach di Miami Soccer Academy tambe a acerca e team di Aruba, y nan a pidi pa riba Diabierna mainta, nan tene un wega amistoso contra e team di ASA Elite Aruba.

   Pues aunke oficialmente nan no tin mas wega pa hunga, toch diripiente a haya nan ta bay hunga dos diferente wega amistoso.

   Mayornan cu ta presente na Miami, a splica cu den nan opinion e head-coach Kike di Aruba a haci un fenomenal trabao, cu demas lidernan a hunga un bon papel, no obstante e tempo calor y sofocante.

   Aruba tabata unico team cu mester a hunga 2 wega riba mesun mainta.  Esaki e di dos wega ey pa 11:45 am, kizas tabata un factor cu Honduras a sobrepasa riba nan, den e di dos wega cu e calor ey.

   Team Aruba lo regresa su isla bek cu cara na halto, cu tres victoria triunfante cu lo bay keda pa semper den nan memoria.