No tin sentido pa spuit den bario si habitantenan mes no ta coopera pa elimina criadero

Director di GKMB, señor Luis Chong:

• GKMB por duna boet pero ta yuda hende preveni 

ORANJESTAD (AAN) Director di GKMB, señor Luis Chong, den entrevista cu DIARIO a elabora tocante “boet” y “spuitmento”, cu ta genera preguntanan cu ta yega su Departamento varios biaha.

  Chong a indica cu boet ta prescribi den ley cu GKMB por parti boet pa hendenan cu no ta cumpli cu locual ta para den ley. “Den Ley ta stipula cu nos ciudadanonan mester tin cura di nan cas limpi, y cu nan mester duna nos acceso na nan cas of cura pa nos por controla tambe. Si un persona no ta cumpli cu esaki nan ta dune un carta di advertencia, pero ley ta prescribi cu enberdad GKMB por duna boet”

director di GKMB a señala, agregando cu te aworaki esaki no ta pasando, pasobra nan ta purba mas tanto yuda hende pa preveni. “Nos no tey pa yega parti boet, pero si ta un obheto cu por wordo uza den ley”, el a reitera.

Señor Chong a menciona cu hende por diferencia di opinion, tin hende ta bisa cu boet ta e unico manera cu hende por siña, pero pakico mester yega asina leu, eigenlijk?

“Spuitmento den bario ta otro tema cu ta bin, hopi, dilanti ainda. Nos ta bisa cu spuitmento den bario ta ultimo recurso cu nos ta uza na GKMB pa por mata sangura. Esaki ta pasa solamente den caso di outbreak ora cu tin un bario cu tin hopi infestacion di malesa di dengue of chikungunya, por spuit e ora ey. Pero spuitmento ta un accion hopi drastico, pasobra e no ta mata solamente sangura sino tur sorto di insecto cu tin rond tambe, manera abeha”, director di GKMB a acentua.

   Señor Chong a señala cu no tin sentido pa spuit den bario si e habitantenan mes no ta coopera pa elimina e criaderonan cu tin.