Financieramente Aruba ta bayendo bon: Su revenue a subi hopi

Director Ehecutivo di KvK drs.Martijn Balkestein:

*Si compara 2019 cu 2024, a subi cu 45% 

ORANJESTAD (AAN) – Director Ehecutivo di Camara di Comercio y Industria di Aruba, KvK, drs. Martijn Balkestein, den entrevista cu DIARIO, a expresa cu KvK ta hopi contento di por continua cu nan encuentronan cu Minister di Economia y Finanzas, Geoffrey Wever.

Camara di Comercio mes ta wak con e situacion financiero ta bayendo na Aruba, y nan a trece dilanti cu Gobierno su revenue a subi hopi. Si compara 2019 cu 2024 el a subi cu 45% mes.

Balkestein a expresa cu no ta un sorpresa cu esaki ta mas tanto danki na e BBO na aeropuerto, cu a wordo introduci dia 1 di Augustus 2023, esey kiermen cu el a subi cu 25% den un aña, pero el a subi hasta cu 84% si compara e situacion awo cu 2019 cu tabata caba situacion di covid-19.

El a comenta cu esaki ta bon pa gobierno, pasobra e por haci loke mester haci pa cu e debenan.

“Pero na otro banda por cuestiona si, si esaki ta bon pa nos mes ciudadanonan y pa comercio, pasobra e placa ta bin na final via BBO”, drs. Balkestein a indica.

El a menciona tambe cu CAFt a menciona den su prome reportahe, cu gobierno a genera 122 miyon di surplus.

El a comenta cu di mes a puntra e minister kico nan ta bay haci cu esey. Practicamente e ta wordo uza pa paga su debenan cu Hulanda, y KvK tambe ta apoya esey, pasobra por paga basta placa riba interes, pero na otro banda ta necesario pa haci inversion. “Hasta CAFt ta indica cu inversionnan cu ta planea pa haci door di gobierno, ta keda basta atras. E plan no ta manera nan a premira esaki”, director ehecutivo di KvK a expresa. El a subraya cu basicamente, financieramente Aruba ta bayendo bon.