Marlon Sneek, Presidente di Parlamento
*Ta mantene e decision di 2019
ORANJESTAD (AAN): Relaciona cu un caso recien cu ta concerni Parlamentario Otmar Oduber, Presidente di Parlamento, Marlon Sneek a enfatisa cu presidente di parlamento no por saca niun hende for di ningun comision. Loke e ta haci ta, ta cumpli cu locual ta e deseo di sala.
Sneek a indica cu sala a bisa cu nan ta mantene e decision di 2019 caminda cu Fraccion di MEP, Fraccion di POR a dicidi cu un parlamentario cu ta sospechoso no mag di representa Aruba riba un plataforma internacional.
Esey por a wak den e tempo di Benny Sevinger como parlamentario. Ocho aña Benny Sevinger a keda riba e lista, esta e nomina di e diferente comisionnan hinca den e comisionnan, el a agrega.
Presidente di Parlamento a sigui bisa cu nunca Benny Sevinger no a presenta na Panama y bisa “ata e nomina aki, ami ta den e comision ey”.
Si Parlamento como organo ta manda un lista oficial pa Parlatino, nan tin cu laga e parlamentario participa den e reunion pasobra bo Parlamento a manda un lista y abo ta den e comision, Sneek a expresa.
E echo cu no a respeta e decision cu sala a tuma, e ora ey, sala den un comision central a dicidi cu ta kita e nomber di Otmar Oduber for di e comision. Asina no ta haya e mesun precedente.
Marlon Sneek a sigui bisa cu esey ta un decision cu a wordo tuma basa riba e echo cu e no a respeta un decision di sala y banda di saca su nomber for di e lista tambe a manda un carta oficial pa informa Parlatino cu Oduber no mag di participa den ningun reunion bao di e capa di Parlamento di Aruba.
El a enfatisa cu e tin cu percura pa e decision cu sala a tuma wordo respeta. Otro biaha, e nomber di Otmar Oduber no lo ta ariba e lista y lo tin un carta oficial cu ta indica cu e no ta representa Parlamento di Aruba.
