No tin ningun garantia cu remedinan busca den boticanan afo ta di bon warda y di bon calidad

Inspector di Remedi Roselynn Angela:

*Inspectie ta proteha e poblacion!

ORANJESTAD (AAN)—Inspector di Remedi Roselynn Angela, den entrevista cu DIARIO a splica cu no tin ningun garantia di e calidad di remedi cu ta bin di afo, pasobra tin hopi botica cu ta riba internet pero no tin ningun prueba cu remedinan ta bon warda, cu nan ta di bon calidad, y eigenlijk, Inspeccion di Remedi ta protehando e poblacion cu e hecho cu e consumidornan tin cu sigui busca remedinan na Aruba.

Ora cu un pashent su remedi ta caba, e tin cu busk’e via Aruba. Kiermen, e tin cu bay na botica local y aki ta wak si nan tin, y si no tin nan ta wak si por hay’e afo, ora cu remedinan cu ta bin di Merca of Hulanda.

Den e caso di e control cu nan a haci na fruteria y supermarket, Inspector señora Angela a menciona cu den fruteria nan a haya Viagra, remedinan pa cuero cu tin un elemento cu tin efectonan secundario hopi grave, tambe antibiotico y remedi pa dolor.

El a menciona tambe cu e negoshi ta esun cu ta carga tur e responsabilidad pasobra nan ta haya e ‘maatregel’ cu lo bin pa nan. Inspectie ta sigui puntra nan di unda nan a haya e productonan pa wak ken mas lo ta responsabel cu e remedi ta den e negoshi eynan.

El a agrega cu pa bende remedi Ley ta duna tres instancia cu por bende cu permiso di minister: e fabrica, pero nos no tin fabrica di remedi na Aruba, e importado cu tin mag di bende den botica, supermarket of otro caminda cu tin permiso pa bende, e tin mag di bay botica bende remedi na pashentnan, y tin un vergunning cu minister por duna na personanan cu no ta boticario ni importado, dependiendo di kico tin den e permiso cu nan mag di bende. Aworaki Inspectie tin un Hurista pero pa negoshinan cu ta bende remedi natural den e hotelnan cu tin permiso di minister, y tur nan empleadonan tin conocemento di e remedi. Pues, nan sa kico e remedinan ta, nan por splica e turistanan pakico mester uza e remedi. Tambe nan por duna ‘nazorg’, y si mester algo despues, nan tin cu bay docter.