Optimalisacion di cultivo comercial na Aruba por duna un balor agrega di Afl.111.8 miyon pa aña

Reemplasando cierto importacion cu produccion local 

ORANJESTAD (AAN): Den marco di e Landspakket Aruba y e Plan di Transicion Economico 2023–2025, ministerio di Finansa, Asunto Economico y Sector Primario a presenta e raport preliminario riba optimalisacion di cultivo comercial ("comerciele kasteelt") na Aruba.

E estudio aki, elabora pa PRIVA den colaboracion cu Santa Rosa y TWO, ta conclui cu Aruba por realisa un balor agrega di Afl. 111.8 miyon pa aña si reemplaza cierto importacion cu produccion local. Minister Geoffrey Wever a reitera e boluntad di parti di Gabinete AVP-Futuro pa brinda tur e sosten necesario pa logra subi Aruba su siguridad alimenticio.

E modelo cu ta wordo proponi – cu produccion centralisa den e futuro Agri-Innovation Park (AIP) – ta brinda un plataforma comparti pa e agricultornan por produci sin e carga di necesidad di inversion capital cuantioso pa por cuminsa.

AIP lo ofrece:

-Greenhouse moderno y infrastructura disponibel pa huur;

-Servicionan logistico y sosten tecnico;

-Oportunidad pa formacion, investigacion y innovacion;

Espacio tanto pa agricultornan estableci como pa agri-entrepreneur nobo.

   E analisis ta mustra cu den un scenario di escala amplio, Aruba por alcanza un mercado potencial di alrededor di Afl. 300 miyon anualmente. No ta exclui e potencial asta di exportacion pa region, aunke esaki "na e momento aki no ta e enfoke primordial", segun Minister Wever.

   "Den e fase inicial di e Agri-Innovation Park ta spera creacion di 130 cupo pa empleo directo. Tin potencial pa crece te un sobra di 300 cuponan pa empleo structural den futuro, na banda di tur e "spin-offs" indirecto di e industria. Nos ta papia aki di diversificacion berdadero y creacion di un pilar di sosten nobo pa e economia di Aruba." – Minister Geoffrey Wever.

   Proximo paso den e proceso ta inclui evaluacion di e factibilidad financiero, e modelo operacional y e diseño tecnico di e compleho di AIP mes. E ministerio ta comprometi pa implementa e proyecto den forma responsabel y sostenibel, den colaboracion continuo cu Hulanda y stakeholdernan local.