Prome Minister y Minister di Husticia a bishita Comandante di Marina Real na Savaneta

Orguyoso di a inicia Formacion Social:

ORANJESTAD (AAN): Diaranson mainta, Prome Minister mr. Mike Eman, acompaña pa Minister di Husticia mr. drs. Arthur Dowers, a haci un bishita cerca e Comandante di Marina Real na Savaneta sr. Tim van Wijk. Prome Minister a expresa su aprecio pa e trabao continuo y compromiso di defensa Hulandes na nos isla. E presencia di Marina Real na Aruba ta un pilar fundamental pa e sentido di siguridad nacional, representando no solamente un defensa militar, pero tambe un simbolo di e laso fuerte den Reino.  

            “Cada bishita ta fortalece e compromiso di e base di militar, e Comandante y tur esnan cu ta dirigi esaki, y ta duna e siguridad un contenido real, tanto cu training como tambe e preparacion y den banda e incorporacion local, cual ta Arumil”, segun Prome Minister.

            Arumil tin un rol importante y ta creciendo den e instituto di Marina Real desde su formacion pa Ex-Prome Minister Henny Eman d.f.m., cu a introduci e concepto di Arubaanse Militie den e structura di defensa. Segun Prome Minister Mike Eman, Arumil a bira un instituto clave den e base na Savaneta, y ta sondeando pa yuda e grupo cu mas oportunidad pa desaroya un carera den nos comunidad.

            Prome Minister a pone enfasis riba e importancia pa mehora e cuadro legal di Arumil, pa fortalece nan posicion y crea mas sostenibilidad durante nan funcion den Marina, como durante e fase di salida y transicion laboral.

            Un otro punto importante cu a atende durante di e bishita, ta Sociaal Vormingstraject (SVT), un iniciativa cu a nace durante Gabinete Mike Eman I cu sosten di Ministerio di Defensa Hulandes, y cu awe ta contribui na formacion di nos hobennan. “Hopi orguyoso di SVT y hopi orguyoso cu nos por a inicia e programa y cu awe ainda ta existi”, Prome Minister Mike Eman a comparti.

            Comandante Tim van Wijk di su banda a comparti un evaluacion di e situacion regional y e rol di e defensa den Caribe. Prome Minister a expresa su deseo pa fortalece e colaboracion cu e base y pa amplia oportunidad pa mas hobennan Arubano cu kier contribui den defensa y servicio di nan pais.

            Nos gobierno ta mira cu entusiasmo e posibilidad pa mas integracion y participacion local, tanto den Arumil como den SVT, y ta invita tur hoben cu tin deseo y disciplina pa tuma su luga den nos defensa nacional.