‘No ta Servicio di Impuesto ta dicidi kende ta bira minister’  

Edwin Duijneveld:

Abogado Croes a entrega peticion na corte pa un ‘voorlopige voorziening’

ORANJESTAD (AAN): Diabierna abogado Mr. Desiree Croes a presenta na corte di husticia den nomber di su cliente Mike de Meza, kende ainda no a ricibi cierto documento for di DIMP, pa loke e proceso pa e bira minister den e Gobierno nobo.

Croes a splica cu a entrega un asina yama ‘Voorlopige Voorziening un un Beroepsschrift  y en bes di haci esaki mainta, a hacie despues di merdia, pasobra el a haya den su poder mas prueba di entre otro pagonan haci di parti di de Meza.

DIARIO a puntra e abogado kico tin e asunto aki pega asina tanto tempo y el a splica cu ta un lastima grandi cu cos mester a yega asina leu, pero ‘aparentemente DIMP ta pensa diferente cu nos’, segun Croes.

“Nos ta wak cu Servicio di Impuesto por duna de Meza e asina yama declaracion di comportacion fiscal”.

Tur cos ta mustra riba e hecho cu el a cumpli cu locual e mester a cumpli cune, pero asina mes nan ta keda para riba e prome decision cu nan a tuma y e impresion cu nos ta haya ta cu nan no kier ‘pedal back’, aunque cu nos a splica nan y a mustra nan cuanto a wordo haci y con tur cos a wordo regla, segun Croes.

Hurista Edwin Duijneveld, kende ta asisti Mr. Croes den e caso aki a duna un splicacion di e caso y a indica cu a cuminza traha riba e peticion pa haya e asina yama Verklaring van Fiscaal Gedrag, cu tur hende tin derecho riba dje, despues cu esaki a wordo nenga na prome instante pa cierto motibo.

“Den nos opinion Servicio di Impuesto ta bruha dos cos den otro”.

Uno ta e fiscal gedrag unda cu un hende por pidi pa haya sa si nan tin debe di belasting of no.

Bo por tin debe y bo a haci un areglo, of bo a entrega un bezwaar.

Pues si bo a cumpli cu locual bo a yega na un acuerdo pe, bo ta haya e declaracion di comportacion fiscal y den nos opinion tur cos di de Meza ta na ordo y asina mes nos ta pega cu DIMP, segun Duijneveld.

El a sigui bisa cu a bay LAR, pasobra e peticion di un ciudadano pa cual e tin derecho riba dje, a wordo nenga.

A bay corte pues pa purba haya un aprobacion riba e peticion pa de Meza haya su verklaring van fiscaal gedrag.

“Despues di entrega e bezwaar belastingdienst ainda keda para riba nan punto di bista y e ora ey nos a apela e decision aki den corte y door cu e caso aki no solamente pa nos cliente sino tambe pa Gobierno ta importante pa wordo resolvi mas pronto posibel, nos a entrega tambe un voorlopige voorziening”.

E ta un tipo di caso sumario, pero den ‘bestuursrecht’ e ta wordo yama un voorlopige voorzieng, segun Duijneveld.

E hurista a splica cu e peticion ta pa mustra cu de Meza no tin debe mas cerca belasting y no tin nada mas pendiente cu servicio di impuesto.

E ta importante tambe pa de Meza, mirando e reaccionnan negativo inhusto contra dje y su cas riba entre otro social media y prensa.

Duijneveld a sigui bisa cu ni MOT, ni polis, ni Servicio di Seguridad tin problema pa de Meza bira minister.

El a splica cu Servicio di Impuesto a dicidi di duna un opinion cu nan ta haya cu door di cierto cos de Meza no por bira minister.

“No ta nan ta dicidi kende ta bira minister, sino Formador hunto cu Gobernador ta dicidi y na final ta Prome Minister ta dicidi si e ta pone un candidato si of no”.

Gobernador tin su opinion y si nan no ta di acuerdo, nan por bay un paso mas leu, segun Duijneveld.