ORANJESTAD (AAN): Prome Minister di Aruba, Mike Eman, a sostene un reunion cu Tisa LaSorte,
Presidente di AHATA (Aruba Hotel and Tourism Association), den cual a haya e oportunidad pa intercambia idea y prepara pa e dialogo nacional cu lo tuma luga pronto.
Durante e reunion, Prome Minister a expresa nan deseo pa garantisa no solamente exito economico pa e sector turistico, pero tambe un reparticion husto di e beneficio cu turismo ta genera, pa e comunidad di Aruba tambe por comparti e exito. Prome Minister a enfatisa cu e meta ta pa crea un modelo di turismo cu ta traha pa henter pueblo, unda e exito mester traduci den un miho calidad di bida.
Mester delinea e temanan principal cu tin impacto riba turismo y riba e bida diario di nos comunidad. Hunto cu Minister di Turismo, mr. Wendrick Cicilia, Gobierno lo sigui evalua tur aspecto di e industria - di infrastructura, formacion, sostenibilidad y participacion local - pa garantisa cu turismo ta bira un exito comparti cu ta sirbi henter Aruba.
E reunion formal cu sector turistico lo sirbi como un plataforma pa alinea vision y traha riba un plan comun cu ta mira futuro cu speransa y determinacion.
