Cooperacion strategico entre Aruba y Hulanda
ORANJESTAD (AAN): Diasabra atardi, Prome Minister di Aruba, mr. Mike Eman, a ricibi cu honor su homologo Hulandes, Prome Minister Dick Schoof, na su oficina na Cocolishi pa un reunion formal y strategico. Durante e reunion cu henter conseho di minister a dialoga riba e lasonan politico y di cooperacion entre Aruba y Hulanda.
Durante e encuentro, Prome Minister Eman a regala su colega Hulandes un regalo importante: e buki “The Archaeology of Aruba: The Pictographs and Petroglyphs” di Aad H. Versteeg y Harold J. Kelly. E obra aki ta un testimonio di 200 aña di investigacion tocante e pinturanan ancestral riba baranca di Aruba, un herencia cultural visual cu ta refleha e profundo laso spiritual di nos antepasadonan cu naturalesa y universo. E regalo tabata un simbolo di orguyo di nos patrimonio y invitacion pa compronde Aruba mas miho.
Prome Minister Eman y Premier Schoof despues a cana hunto pa Fort Zoutman, caminda nan a planta un mata di Wayaca, simbolo di autosuficiencia y resiliencia Arubano. E mata Wayaca, cu ta sobrevivi den secura y florece den tempo di bonansa, ta representa e spirito fuerte y speransa di nos pueblo.
E bishita a sigui cu un reunion cu e Gabinete AVP-Futuro, caminda cada minister a presenta su puntonan primordial na Premier Schoof. E dialogo constructivo a culmina cu un declaracion conhunto, den cual Prome Minister Eman a enfatisa cu Aruba kier mantene un relacion cu Hulanda basa riba respet mutuo y bon entendimento. Prome Minister Schoof, na su beurt, a expresa gran interes den e oportunidadnan 'win-win' cu e gabinete nobo a propone, entre otro e recien acuerdo cu Royal Schiphol Group.
Un di e logronan importante di e reunion ta e acuerdo pa forma un cooperacion strategico entre Aruba y Universidad di Wageningen, cu lo lansa un proyecto nacional di planta mata. E iniciativa aki lo yega den tur area di Aruba, pone un base firme pa sostenibilidad y desaroyo cientifico den Reino Hulandes.
Cu e bishita oficial aki, ta habri caminda pa un rumbo di cooperacion, respet y desaroyo mutuo. Aruba ta cla pa e retonan di futuro y hunto cu Hulanda, lo construi un futuro mas prometedor y duradero.
