ORANJESTAD (AAN): Durante sesion informativo na YMCA San Nicolas,
ekipo encarga cu elaboracion di e ley a brinda claridad tocante e sosten financiero presenta y e procedimiento di solicitud
E proposicion di ley pa brinda sosten financiero na famianan cu muchanan cu necesidad intensivo di cuido ta resultado di un proceso di preparacion y colaboracion entre diferente instancia gubernamental y profesionalnan involucra den maneho social. Durante e prome sesion informativo na YMCA San Nicolas, dos di e profesionalnan cu a participa den elaboracion di e legislacion a splica e trayectoria di e iniciativa, e criterianan cu ta central den e ley y e preparacionnan pa su eventual implementacion.
Chanin Boekhoudt, funcionario di maneho na Departamento di Asunto Social, y Wiebren van Dijk, programmamanager Landspakket Aruba, a destaca e importancia di e iniciativa legislativo pa famianan cu muchanan cu ta rekeri cuido intensivo.
E ley, oficialmente denomina Landsverordening tegemoetkoming voor kinderen met intensieve zorgbehoefte, ta actualmente na Parlamento pa su tratamento y eventual aprobacion.
Un proceso di elaboracion den cuadro di Landspakket Aruba
Segun Chanin Boekhoudt, e preparacion di e ley ta conecta cu e revision di legislacion social den cuadro di Landspakket Aruba, incluyendo e revision di e sistema di bijstand.
Durante e proceso aki, a incorpora tambe e iniciativa legislativo presenta na 2021 pa Mike Eman y Mervin Wyatt-Ras, cu tabata enfoca riba asistencia financiero pa famianan cu muchanan cu discapacidad.
Boekhoudt a splica cu un ekipo di proyecto, consistiendo di profesionalnan di diferente area, a traha riba elaboracion di e proposicion di ley.
E ekipo a inclui Gil Bangert, Wiebren van Dijk, Jessica Arends, Nina Tromp y Boekhoudt mes, cu hunto a contribui na e preparacion di e marco legislativo.
Wiebren van Dijk a confirma cu e proceso a involucra colaboracion entre e ministerio concerni, Departamento di Asunto Social y e ekipo di Landspakket Aruba, cu e obhetivo di crea un instrumento legal cu por brinda sosten concreto na e famianan cu mas necesidad di asistencia.
Intensidad di cuido como criterio principal
Un di e puntonan importante cu Boekhoudt a aclarea ta cu e ley no ta limita su aplicacion na un enfermedad, diagnostico of tipo specifico di discapacidad.
E criterio principal ta relaciona cu e impacto cu e limitacion tin riba funcionamento diario di e mucha y e intensidad di cuido cu e ta rekeri.
Esaki ta nifica cu den evaluacion di un solicitud, lo tene cuenta cu e necesidad real di cuido adicional compara cu esun di un mucha cu no tin e limitacion.
Boekhoudt a recorda cu Aruba actualmente tin legislacion pa asistencia financiero na personanan cu discapacidad for di 16 aña. Sin embargo, muchanan mas hoben cu e edad aki no ta bin na remarca pa e asistencia existente, apesar cu nan necesidad di cuido por ta igualmente intensivo.
E proposicion di ley nobo ta busca atende e necesidad aki y contribui na e gastonan adicional cu mayornan ta enfrenta.
Cantidad di beneficiario ainda mester determina
Chanin Boekhoudt a indica cu, basa riba cifranan di CBS, tin un estimacion preliminar di aproximadamente 400 mucha cu eventualmente por ta relevante pa e iniciativa.
Sin embargo, el a aclarea cu e cantidad real di muchanan cu lo bin na remarca ainda no ta conoci.
Solamente despues cu e ley ta aproba y e proceso di solicitud cuminsa, lo por determina cuanto mucha efectivamente ta cumpli cu e criterianan estableci.
E distincion aki ta importante, considerando cu no tur mucha cu tin un discapacidad automaticamente lo bin na remarca. E evaluacion lo enfoca riba e necesidad intensivo di cuido cu e condicion ta ocasiona den bida diario.
Sesion informativo ta brinda oportunidad pa dialogo y evaluacion di formularionan
Durante e encuentro na YMCA San Nicolas, e ekipo a brinda mayornan informacion tocante e contenido di e ley, e criterianan pa bin na remarca y e manera cu e proceso di solicitud ta proyecta pa funciona.
Van Dijk a splica cu e sesion tambe a brinda oportunidad pa pone na prueba e formularionan cu ta prepara pa e futuro proceso di solicitud.
E contacto directo cu mayornan a permiti e ekipo observa con e informacion y e formularionan ta comprendi pa e grupo, cu eventualmente lo haci uzo di e sistema.
Segun Van Dijk, e fase actual di e proceso ta un paso importante, considerando cu e ley ta actualmente na Parlamento y e ekipo ta preparando e aspectonan practico necesario pa su implementacion.
El a expresa satisfaccion cu e resultado di e trabou legislativo y cu e posibilidad cu e ley por ofrece pa yuda mayornan brinda e miho cuido posibel na nan yiunan.
Solicitudnan por cuminsa despues di aprobacion di e ley
Ambos profesional a enfatisa cu e ley ainda ta den fase di tratamento parlamentario.
E proposicion ta contempla un sosten financiero di Afl. 500 mensual pa cada mucha cu cumpli cu e criterianan estableci, cu e intencion pa e medida drenta na vigor na januari 2027, mara na aprobacion di Parlamento.
Chanin Boekhoudt a indica cu e proceso oficial di solicitud lo por habri solamente despues cu e legislacion ta aproba y e disposicionnan necesario pa su implementacion ta estableci.
Na e momento ey, mayornan lo ta informa mediante e diferente medionan di comunicacion tocante e procedimiento y e manera pa presenta nan solicitud.
Sosten concreto pa famianan cu necesidad intensivo di cuido
E iniciativa legislativo ta busca brinda un contribucion financiero na mayornan cu diariamente ta enfrenta gastonan adicional pa cuido di nan yiunan.
Pa Van Dijk, e ley ta representa un oportunidad pa brinda un sosten necesario na famianan cu muchanan cu ta rekeri hopi cuido, permitiendo nan haya mas posibilidad pa atende e necesidadnan di nan yiunan.
E splicacionnan di Boekhoudt y Van Dijk durante e sesion informativo a pone claridad riba dos aspecto esencial: e importancia di evalua e necesidad real di cuido di cada mucha y e preparacion di un procedimiento cu mayornan por compronde y uza.
Cu e proposicion di ley actualmente na Parlamento, e ekipo ta sigui su preparacionnan pa cu, una bes cu e legislacion ta aproba, e sistema di sosten financiero por wordo implementa y e famianan cu ta bin na remarca por presenta nan solicitud.
