Natusha Croes lo yuda tur hende cu un workshop di ‘performance’

ORANJESTAD (AAN): E director di Ateliers ’89 a confirma esaki pa DIARIO!  Nan flamante artista di Beyas Artes Aruba, esta Natusha Croes lo duna un workshop di ‘performance’ cuminzando otro siman Dialuna atardi pa anochi.

   E artista contemporaneo Natusha Croes a termina su estudio na Gerrit Rietveld Academie, Audio Visual Fine Arts na 2015, y su Master of Arts in Performance Making na Goldsmiths University of London na 2019.

   A confirma pa DIARIO, cu e lo ta facilitando un taller di arte bibo (live art), usando su practica como creadora multidisciplinario. Durante 17 Mei te cu 11 di Juni 2021, e lo haci esey tur Dialuna, Diamars, Diaranzon y Diabierna di 6:00 pm pa 9:00 pm na Ateliers ’89 na Playa.

   Lo enfoca durante e taller aki riba e externalizacion di e’ espacio interior di cada un di e participantenan usando medio artistico manera texto, dibuho, pintura y collage. Asina pasando door di un proceso introspectivo, corporal pa asina manifesta den pistanan di palabra y imagen loke ta biba den nan. For di eynan lo analisa e vision board crea, pa duna un ruta di buskeda pa e materialnan cu lo por crea e portal entre nan realidad interior pa lo exterior. Esaki lo manifesta un realidad nobo den formato tres dimensional. Usando tecnica di diseño di obheto of espacio tridimensional manera scultura y instalacion pa asina crea e set-design of e plataforma cu lo ser finalmente activa y presenta den performance di video. 

   Un viahe profundo den e participante nan mesun sentido di existencia pa asina conecta cu nan alma y fuente di creatividad. Natusha Croes lo facilita e proceso cu diferente ehercicio di revelacion y modo creativo unico di contesta preguntanan manera: “Ken mi ta di paden bayendo pafo?”   A compronde cu cuponan lo ta limita.