E guera contra trafico humano ta importante pasobra trafico humano ta un abuso di e derechonan humano

ORANJESTAD (AAN): Jeannette Richardson Baars di  Coordinatiecentrum Mensenhandel Mensensmokkel Aruba (CMMA) ta experto riba trafico humano y contrabando di persona.

Diabierna a cuminza un campaña contra trafico humano y net prome cu estreno di e pelicula local ‘Otro Banda di Lama’, Baars a hiba palabra.

El a uza un poema bieu di su mes cu el a skirbi pa splica kico ta e problema di traficacion y contrabando di hende.

E poema ta papia riba e importancia di e guera contra traficacion di hende, unda cu ta wordo menciona entre otro cu hopi hende no sa kico ta trafico humano, of nan no ta realiza ken por bira victima di esaki.

Banda di esaki e poema ta splica cu no ta tur ora hende ta raporta circunstancianan sospechoso of casonan cu nan ta topa.

Baars a trece dilanti tambe cu hopi biaha victimanan no ta papia y no ta duna un declaracion pues na autoridadnan, pa nan por cuminza un investigacion.

Preguntanan semper ta bin dilanti tambe riba e posibel limitacionnan den ley pa duna castigonan halto pa trafico humano na Aruba.

Un problema grandi den e casonan extremo di trafico humano, ta cu hopi victima ta keda cu un trauma pa resto di nan bida.

Pesey un isla di Aruba tambe mester tin fondonan suficiente pa ataca e problema aki, segun Baars.

“E guera contra trafico humano ta importante, pasobra traficacion di hende ta un abuso di e derechonan humano”.

E ta importante tambe pasobra tur hende por bira victima di trafico humano, segun Baars.