ORANJESTAD (AAN) — E bunita labor altruista y solidario di Lourdes Bramble na Hulanda, y ademas, su lucha incansable pa emancipacion di hende Muher, a hacie merecedo di diferente Award hopi importante.
DIARIO a conclui su di dos articulo, publica Dialuna, mencionando cu Lourdes a siña di su trabao cu e ta guia, sostene y duna e personanan cu mester di ayudo e toolsnan pa nan mes por mira unda e caminda ta y sigui esaki, sin cu e mes ta regla tur cos pa nan. El a sigui conta nos:
“Si bo tene nan na man, regla tur cos pa nan, e personanan aki nunca no ta siña con pa cana. Dus, locual cu mi a haci ta, ya cu door di mi trabao y di mi posicion na e organizacion aki, mi tabata tin hopi posibilidad y chens pa organiza hopi pa cantidad di hende vulnerable, mi por bisa cu centenares di hende a haya trabao; centenares di hende a logra sigui un opleiding pa haci algo den nan bida, haya e tools pa nan mes por cuminza biba, y no cera nan curpa, pasobra na Hulanda nos tin hopi hende cu ta masha isola, cu ta biba riba nan mes y no tin contacto cu otro hende”, Lourdes a comenta.
Pa tur esaki Lourdes ta zorg pa e personanan aki haya un “vang net” pa nan haya amistadnan pa yuda nan.
Lourdes a trece dilanti cu como trahador social, coordinador of lider di proyecto, e no por yuda tur hende. “Bo mester cera nan conoci cu otro hendenan cu por yuda nan haya nan caminda, y tur esey pa nan sali di nan soledad, participa den un municipio y asina aki tambe nan ta siña con pa yuda otro hende”, el a acentua.
Pa Lourdes mes, su experiencia a mustre cu tur hende por tuma e chensnan cu ta haya y converti nan den exito pero mester tin hende rond di dje cu ta willing pa yude.
Den su caso, Lourdes tin un casa cu ta hopi motiva pa yud’e, pasobra enberdad pareu na su trabao, e tabata studia, e tin su casa y nan tin yiunan.
“Dus, bo tin bo contactonan cu otro famia, amigonan y tur esey kiermen, cu tur ora bo ta bezig ta haci choice den bo bida y pone prioridadnan y bisa: ‘esaki ta bay prome y esaki ta keda atras’. Bo por haci esaki solamente si bo tin hende rond di bo cu ta keda motiva bo pa bo haci e eleccionnan ey; cu nan ta keda hunto cu bo, yuda bo den tur locual bo ta haci”, Lourdes a señala.
Lourdes nunca tabata tin e gevoel cu el a duna su yiunan menos atencion, no obstante cu banda di su trabao e tabata hopi den organizacion y den tur stichting cu tabata tin como meta traha na bienestar di hendenan. “Mi mes a lanta cantidad di stichting; pero tambe mi tabata tin mi hobbynan, manera balia cu mi casa, mi tabata tin un dance groep, mi tabata participa den grupo di carnaval, y ainda mi ta lider di bestuur di stichtingnan di carnaval. Mi a organiza hopi cos den mi bida y pa tur esaki mi a haya awards”, Lourdes a menciona.
AWARDS:
Na 2008, Lourdes a gana e Zami Award: un premio cu tur aña ta wordo otorga na un persona na Hulanda, cu a destaca pa motibo di su lucha incansable y su logronan pa cu emancipacion di hende muher.
Na 2007 y 2009, Lourdes a wordo nomina pa e premio di Emancipacion di Hende Muher na Alkmaar, como cu el a haci hopi pa e hendenan muher di e ciudad aki.
Na 2015, el a wordo nomina pa e Taalprijs di Hulanda: Esaki ta un premio pa e trabaonan incansable cu el a haci pa hendenan, pa nan por siña e Idioma Hulandes. E premio aki ta wordo otorga cada dos aña door di Stichting Lezen en Schrijven. E Stichting aki a wordo funda door di Princess Laurentien der Nederlanden.
