Naturalesa ta bira menasa pa turismo parti Noord di Caribe

ORANJESTAD(AAN)- Cu hopi lucha e islanan Hulandes situa na e parti Noord di region di Caribe, a trata di recupera di e resultadonan cu Covid-19 no solamente tabata tin pa bida di hende pero tambe pa e economia fragil di e islanan.

Mientras vacunacion mundial mester yuda habri posibilidad di turismo den e region, mescos cu ta e caso rond mundo, e cadena di islanan den Noord di Caribe ta hopi preocupa.

E islanan Hulandes Saba, Sint Maarten y Sint Eustatius, ta parti di e totalidad di e region cu ta trata na sobrevivi e pandemia pero tambe na restaura nan economia cu a wordo seriamente afecta.

Mientras cu ayudo Hulandes a vacuna e poblacion y asina ta duna mundo un prueba cu turistanan por bolbe e islanan cu ta depende pa un gran parti di bishitantenan, temporada di horcan 2021 cu mester wordo vigila semper awor no ta e unico factor cu por stroba loke a islanan Hulandes den e parti Noord di Caribe a trata di alcansa.

Naturalesa na diferente forma ta bira un problema y un mal propaganda pa e islanan, cu a prepara pa habri nan porta pa mundo atrobe.

Mal noticia sigur tabata algun tempo pasa ora noticia a plama rapidamente di e peliger di tribon na costa di Sint Maarten.

Mientras a logra hala e noticia for di atencion, a surgi problemanan nobo ora actividad di volcan a dirigi atrobe tur atencion riba e islanan na forma negativo.

Sint Vincent y Grenadines a wordo seriamente afecta pa e calamidad, cu a trece gruponan di asistencia for di Anguilla entre otro, manera DIARIO na forma exclusivo a raporta.

Tambe mencion a wordo haci di e cantidad di caso di e coronavirus nobo na Sint Vincent y cu por a menasa no solamente habitantenan di e isla cu mester a bini hunto pa haya refugio contra e volcan, pero tambe gruponan cu a bay presta yudansa na e isla den problema.

Anguilla dos siman pasa mester a cera su porta pa bishitantenan ora Covid-19 a bira un menasa serio na e isla.

Na Sint Maarten a registra temblor na inicio di Mei.

Mal propaganda pa turista a alcansa resto di mundo, cu a cuminsa specula riba otro posibilidadnan.

Na 2020 Reino Hulandes a investiga e posibilidad si e volcan na Saba por tabata produci gas. Esaki lo no tabata e caso pero e instancia oficial di Hulanda pa asuntonan di clima y temblor KNMI a sigui vigila e situacion.

Siman pasa atrobe alarma a wordo bati mientras informacionnan a wordo emiti cu na Sint Kitts tabata tin un volcan activo.

Pa habitantenan di Sint Maarten esaki tabata un menasa den porta di nan cas. Na mes momento nan tabata tene na consideracion, mescos cu tur e otro islanan, cu e informacionnan aki ta afecta nan posibilidad pa recupera nan turismo.

Riba imagen cu nos ta presenta awe por mira e situacion geologico di e parti Noord di Caribe y e riesgo grandi cu movecionnan bou suelo por tin pa e region.

Mientrastanto autoridad climatologico a anuncia cu e islanan mester ta prepara pa temporada di horcan, cu por pasa na cualkier luga den Caribe, pero ta un peliger mucho mas grandi na e region mas pa Noord.

Segun informantenan e islanan awor ta trata na emiti informacionnan den cual nan ta splica mundo cu e menasa grandi di naturalesa no ta existi y cu no tin peliger pa bishitantenan cu na diferente occasion a mira nan potencial turistanan, cambia di destinacion pa biaha por ehempel pa Aruba den temporada di horcan, cu den region pacifico ya a produci e prome tormenta cu nomber pa 2021.