ORANJESTAD (AAN): E proyecto piloto PRISMA, na 2019-2020 a conta cu un investigacion di Universidad di Aruba pa asina por a wak e efectividad di e programa,
cual ta enfoca riba esnan cu tin diabetes tipo 2, asina Charlene Leslie, Coordinador di e programa a duna di conoce.
El a agrega tambe cu e resultadonan di e investigacion a mustra cu e proyecto aki ta uno hopi positivo. Tabata tin den 6 luna, entre september y februari, 75 participante y e 'score' cu a haya di e participantenan aki riba e parti di satisfaccion tabata un 9.3 a base di un schaal di 1 pa 10.
Por a mira un influencia positivo riba e maneho propio y riba con e participantenan ta percibi e malesa. PRISMA tambe tabata tin un impacto positivo riba e cumplimento di e terapia, unda por a wak esey riba e nivel di alimentacion, di actividad fisico, pero tambe e uzo di medicamento.
COVID-19 a trece cu ne algun efecto riba e maneho propio y algun participante a indica cu nan no a logra cumpli cu tur cos cu nan a planea. Esaki tabata un factor externo cu a afecta e resultadonan, a enfatisa.
Actualmente Universidad di Aruba ta cabando cu e investigacion aki riba e parti biomedico pa asina por wak si PRISMA tabata tin un efecto positivo riba entre otro, peso, midinan, pero tambe riba e nivel di sucu den sanger y colesterol, cu ta factornan di riesgo cu por mira den cifranan, Leslie a señala.
