Nando de Kort y Renny Greaux a confirma cu nan ta den ‘Torneo di Pesca Savaneta’

ORANJSTAD (AAN): Recientemente ya DIARIO a mustra cu e conocido piscado di Savaneta,

Renny Greaux a declara cu e ta cla pa subi lama riba dia 28 di September, den e ‘Torneo di Pesca Savaneta’.

   Tur esaki na caminda pa Savaneta Seafood Festival, organiza pa Fundacion Savaneta Prome Capital.

   Pero awor a bin tuma nota, cu un otro piscado veterano di e distrito, esta Nando de Kort, a bisa cu e tambe ta cla pa bay participa, y hasta bay cu e premio di e Torneo di Pesca.

   E Torneo di Pesca aki lo bay ta di 2 categoria.  Categoria 1 ta boto te 24 pia cu maximo 3 piscado abordo.  Categoria 2 ta boto di 24 pia y mas, cu maximo 5 piscado abordo.  Inscripcion ta 50 Florin pa cada participante, y lo ricibi un long-sleeve Fishermen shirt.

   Premio ta pa boto tur dos categoria.  Esta 1.000 Florin pa e boto ganador mayor kilahe.  Tambe premio di 500 Florin pa boto segundo lugar mayor kilahe.  Tambe ganadornan lo ricibi trofeo.

   Tambe lo tin extra premio di 500 Florin individual, pa e pisca di mas grandi na kilahe.

   Esnan cu kier participa tin di contact na Whatsapp 594-0644.  Lo bay tin un Captain’s Meeting riba Diabierna 26 di September na Centro di Bario Savaneta, cuminzando pa 8:00 pm.  Pues corda inscribi trempan.

   Riba e dia di competencia, tur cos lo ta centralizando na e Pier di ex-Brisas del Mar Savaneta.