Robert Maduro a informa:
*Prensa Internacional hopi interesa pa duna cobertura
ORANJESTAD (AAN) – Gobierno di Aruba a yama un conferencia di prensa, Dialuna atardi, den cual señor Robert Maduro a duna informacion tocante e actonan di despedida y homenahe postumo na nos gran baluarte musical y icono cultural di Aruba, señor Robert Jeandor.
Robert Maduro a expresa: “Dia 17 di September ultimo, Diaranzon siman pasa, nos a wordo sacudi cu un noticia mainta trempan cu Robert no ta cu nos mas. Esey a causa un consternacion, un dolor profundo den pueblo di Aruba completo. Tur cu conoce Robert, su amigonan, su musiconan cu ta deal cu ne, su amigonan di afo, y esey durante e dia ey y te cu awe nos a bin poco, poco manehando, y den nomber di Gobierno di Aruba, Minister President y alavez minister di cultura, nos kier a manda palabranan di condolencia, muy specialmente na su famia, principalmente pa Vivian, Anouska, Robertico, su nietonan, su rumannan, y demas familiarnan. Tambe riba instruccion di nos Minister di Cultura y Minister President, pa nos por duna tur e cooperacion posible di parti di gobierno, p’asina aki por tin un despedida na honor y calidad na e grandura cu Robert Jeandor merece.
Mi kier a gradici den nomber di gobierno tanto Comision Celebracion Dianan Nacional (CCDN), como Cuerpo Policial, DOW, coleganan di ministerio, nos tur cu a duna un man pa nos por a presenta un programa awe, di loke ta bay pasa tanto Diabierna como Diasabra”, señor Robert Maduro a indica.
Robert Maduro a duna di conoce cu tin hopi interes di musiconan di Curacao, Bonaire y tambe Republica Dominicana, cu lo bay haci acto di presencia; tambe tin interes di prensa internacional. Robert tabata un artista cu a profila su mes grandemente na nivel internacional, y prensa ta keda interesa den su despedida, y ta acercando pa nan cubri tur esaki. Tambe e plataformanan internacional di noticia ta hopi interesa pasobra e actonan di despedida lo wordo retransmiti via Aruba su Canal Nacional Tele Aruba y conhuntamente un link cu tur nos otro plataformanan digital.
“Pa motibo cu nos tin un despedida planea tambe pa diabierna awo, dia 26, nos edicion di ban bek Caya, a wordo postpone pa un siman despues, esta dia 3 di October, door cu Robert tabata tin algun deseo, prome cu su partida. A papia cu su famia, cu mi persona, cu algun di nos y hopi di e musiconan, artistanan cu tabata comprometi cu Ban Bek Caya caba dia 26, cu tambe lo duna sosten y homenahe na Robert. Nos ta haya cu ta mas cu na su luga postpone e evento di Ban Bek Caya pa dia 3 di October, dunando espacio completo na loke ta e despedida di nos gran amigo Robert Jeandor”, Robert Maduro a informa.
