E tabata deseo di Robert mes
- Publico invita pa join e parada pero bin bisti cu paña colorido
ORANJESTAD (AAN): Den fin di siman, DIARIO a tuma nota cu ya caba dirigentenan di e grupo carnavalesco Los Laga Bai, ta invitando tur nan participantenan pa bay rindi homenahe na e despedida di e legendario musico icono Robert H. Jeand’or.
Diabierna 26 di September, for di 5:00 pm te cu 6:00 pm, nan lo bay ta den un parada cu ta move rapido, for saliendo for di Aruba Entertainment Center den Avenida Milio Croes, yega na cruzada di Banco di Caribe, bay zuid den Vondellaan y finaliza na Cas di Cultura.
Mas dilanti lo bay tin e shersh cu caha di Robert aden coriendo, y nada mas nan dilanti. Patras di e shersh lo tin e Sound Trailer di Solo Banda Show, cu tur speaker dirigi patras. Aki tras lo bay tin participantenan di Los Laga Bai tur bisti na trahe colorido. Aki publico tambe ta invita pa participa den e masa aki. Tur hende ta bon bini, y corda bay cu paña colorido.
Ora di yega den Vondellaan net na rand di Cas di Cultura, aki e truck lo stop, y sigui suministra musica y sonido for di 6:00 pm te cu 9:00 pm. Aki ta unda diferente musico local lo bay haya chens di subi e Trailer di Banda pa asina tambe cada uno lo despedi cu musica y homenahe. Publico por aglomera riba Vondellaan, tambe e parti mas pabao di Plaza Libertador Betico Croes, y tambe riba Plaza Libertador Simon Bolivar.
A compronde cu Robert su deseo mes tabata pa haci su ultimo recorido riba e ruta, cu pa 30 aña el a pone ambiente cu Los Laga Bai.
Dirigentenan di Los Laga Bai ta pidi pa tur participante acudi pa asina riba e tononan di Solo Banda Show, nan acompaña maestro Robert Jeand’or te na Cas di Cultura pa un homenahe bon mereci.
E siman aki lo por spera e anuncio oficial di Gobierno riba e plannan mas concreto pa e entiero..
