Nada di solucion a largo plaso pa molester di cacho y adictonan ambulante na Palm Beach

 Tisa LaSorte, CEO di AHATA:

ORANJESTAD (AAN): E problematica di cacho cu ta cana los riba nos beachnan y di adictonan cu ta keda un molester, ta bira un preocupacion cada biaha mas serio, specialmente den e area di Palm Beach na unda hopi mas turista ta bishita.

   Señora Tisa LaSorte, CEO di AHATA, a expresa den un entrevista recien cu e ta ricibi hopi keho di esaki for di personanan cu ta traha den e area aki. Segun e CEO di AHATA, e situacion ta yega te na un punto unda siguridad di bishitante y trahadonan por wordo comprometi, ya cu hopi biaha cachonan ta hasta morde hende.

   Señora LaSorte a enfatisa cu AHATA ta apoya e Fundacion Stimami Sterilisami entre otro pa e gran esfuersonan cu nan ta haci pa kita mas tanto posibel e cachonan cu ta cana los. Sinembargo, señora LaSorte a bisa, e problema ta persisti.

   Aruba tin un ley di cacho, pero segun LaSorte, e gran pregunta ta: ken ta responsabel pa e ehecucion di e ley aki y pa tuma e accion diariamente? Polis tambe ta man yen y na final nos no sa ken ta esun encarga pa e tipo di problemanan aki”, LaSorte a expresa.

   Tocante e problema creciente di adictonan ambulante cu ta drenta mas y mas den e area hotelero, LaSorte a bisa cu ainda nan no ta mira un maneho serio pa un solucion a largo plaso. AHATA ta den dialogo constante cu Stichting HUNTO, un organisacion cu ta considera como experto den strategia pa combati e tipo di reto social aki.

   Pero, segun LaSorte, nan ta warda un plan integral di banda di Gobierno, pasobra e situacion ta yega un punto unda e ta pone presion riba e sector hotelero y eventualmente ta forma un riesgo pa Aruba su imagen como destino turistico.

   Concerniente e Tourism Security Patrol di Aruba, LaSorte a aclarea cu nan funcion principal no ta pa haci e trabou aki. Nan ta sirbi como ‘extra wowo’, pa raporta problematicanan na Polis, y nan por duna informacion, pero no por tuma accion den e problematica aki manera Polis. AHATA ta mantene dialogo cu KPA pa busca solucion pa e situacion cu ta empeora den e area turistico di nos pais.