Na Tweede Kamer Aruba a presenta vision di beneficio mutuo den Reino

Prosperidad comparti pa pueblo

ORANJESTAD (AAN): Prome Minister di Aruba, Mike Eman, a reuni cu e comision fiho di Relacionnan den Reino (Koninkrijksrelaties) di Tweede Kamer, caminda el a presenta su vision tocante un cooperacion mas estrecho entre e paisnan den Reino y e importancia di comparti e prosperidad economico di Aruba cu e clase trahado.

   E reunion a tuma luga bou di presidencia di Anouschka Biekman (D66) y conta cu presencia di varios fraccion entre otro CDA, D66, PRO, VVD y mas. Prome Minister Eman tabata acompaña pa Minister Plenipotenciario di Aruba, Mildred Schwengle, y Minister di Turismo, Transporte y Labor, Wendrick Cicilia. E encuentro a brinda un oportunidad pa intercambia pensamento, particularmente despues di e bishita di trabao cu e comision a realisa na Aruba algun tempo pasa.

   Un di e temanan principal cu Prome Minister Eman a pone riba mesa ta e necesidad di duna e relacionnan den Reino un dimension nobo, basa riba beneficio mutuo. Eman a splica cu Reino Hulandes ta basa riba un historia comparti cu ta crea compromiso entre e paisnan, pero cu ta importante pa desaroya un vision nobo cu tambe ta ofrece beneficio concreto pa Hulanda.

   Den e contexto aki, el a menciona e posicion strategico di Aruba den region como un oportunidad pa atrae institucionnan di conocemento y empresanan Hulandes cu por uza Aruba como punto di salida pa actividadnan regional. Como ehempel, Prome Minister a destaca e cooperacion cu Wageningen University & Research (WUR), cu actualmente ta explorando posibilidad pa establece permanentemente na Aruba.

   Segun Eman, e iniciativa aki a lanta interes entre e miembronan di e comision, cu a expresa nan disposicion pa explora con nan por contribui na realisacion di e establecimento. E vision di Prome Minister ta pa Aruba desaroya como un centro regional di conocimento, caminda institucion y empresa internacional por contribui na desaroyo di region.

    Salario minimo y prosperidad comparti:

   Hunto cu Minister Wendrick Cicilia otro tema cu Eman a atende durante e reunion ta e intencion di Gobierno di aumenta salario minimo pa trahado por beneficia mas di e crecemento economico di Aruba. Prome Minister a señala cu e sector turistico a registra un crecemento extraordinario durante e ultimo añanan, particularmente den e ingreso cu e hotelnan ta genera pa camber disponibel (RevPAR). Sin embargo, segun Eman, hopi empleado, specialmente esnan cu ta traha den housekeeping y cushina, no a mira un mehoracion proporcional den nan salario.

   Eman a menciona e proposicion pa aumenta salario minimo como parti di e esfuerso pa logra un reparticion mas husto di e prosperidad. El a enfatisa cu gobierno ta determina pa sigui cu e proceso legislativo, pero na mes momento ta dispuesto pa dialoga cu sector empresarial, particularmente e empresanan chikito cu por tin mester di asistencia pa adapta na e cambio.

    Segun Prome Minister, e reaccionnan cu el a ricibi durante su encuentronan cu parlamentario Hulandes tabata positivo tocante e principio di un reparticion mas husto di e crecemento economico. Eman a reitera cu e intencion no ta pa crea dificultad pa e empresanan, sino pa percura cu esnan mas vulnerabel den comunidad tambe por beneficia di e prosperidad di Aruba.