Segun Director di Utilities Aruba NV Joseph Everon:
ORANJESTAD (AAN): Aruba Wastewater Sustainable Solutions (AWSS) a haci inversionnan adicional den su incineratornan cu e meta di sigura un incineracion completo di desecho medico y cumpli cu e normanan ambiental aplicabel. Asina director di Utilities Aruba NV, Joseph Everon, a indica den un entrevista reciente cu DIARIO.
Everon a enfatisa cu cumplimento cu normanan local y internacional di medio ambiente ta un parti esencial di e procesamento di desecho. Segun su splicacion, e inversionnan ta dirigi na mehora e proceso di incineracion y limita su impacto riba medio ambiente.
Tocante desecho berde, entre otro mata y palo, Everon a splica cu AWSS tin areanan designa pa colecta y almacena e materialnan aki. E desechonan ta wordo separa den diferente vak prome cu nan pasa pa procesamento.
El a destaca tambe cu e relacion y cooperacion entre AWSS y Serlimar ta bayendo bon. Den e colaboracion aki, Serlimar ta encarga di colecta y transporta e desechonan pa AWSS, unda nan ta wordo procesa.
Everon a subraya cu tanto inversion den ekipo como un bon coordinacion entre e dos companianan ta esencial pa un maneho responsabel di desecho. E meta ta pa fortalece e proceso di colecta te na tratamento final, cu atencion pa cumplimento cu normanan ambiental y proteccion di medio ambiente.
