Tin falta di structura di parkeerplaats pa personanan cu discapacidad

Segun Secretario VRA Thomas Ruiz:

ORANJESTAD (AAN): Secretario di Vereniging Rijscholen Aruba (VRA), Thomas Ruiz, ta señala cu Aruba ainda no tin un departamento designa caminda personanan cu discapacidad fisico por solicita un permiso oficial pa uza parkeerplaats reserva pa nan. Den un entrevista cu DIARIO, el a indica cu, segun ley, Gobierno mester designa un departamento pa atende e solicitudnan aki y emiti e carchi corespondiente pa pone den auto.

   Ruiz a expresa preocupacion tambe pa e falta di accesibilidad na cierto luganan na Aruba. Como ehempel, el a menciona Corte, caminda, segun e, e acceso pa personanan cu ta uza rolstoel of scootmobiel no ta adecua.

   Relaciona cu e parkeerplaatsnan reserva pa personanan cu discapacidad, Ruiz a splica cu, segun su investigacionnan, nan mester cumpli cu midimentonan y rekisitonan tecnico conforme normanan internacional. Sin embargo, segun su evaluacion, gran mayoria di e parkeerplaatsnan na Aruba no ta cumpli cu e exigencianan aki. El a agrega cu e borchinan tampoco semper ta conforme cu loke ley ta establece.

   Segun Ruiz, e iregularidadnan aki ta limita e posibilidad pa polis actua contra personanan cu ta uza e parkeerplaatsnan sin autorisacion. El a menciona, entre otro, situacionnan caminda solamente tin un simbolo di discapacidad pinta riba klinkers, cu, segun e, tampoco ta segun ley.

   El a enfatisa cu un parkeerplaats reserva mester tin tanto e midimentonan adecua como e borchi corecto, pa asina por cumpli cu e rekisitonan legal y facilita control.

   Ruiz a indica ademas cu e permiso of carchi oficial pa pone den auto mester wordo emiti pa e departamento encarga cu esaki. No obstante, segun e, e structura aki nunca a wordo estableci na Aruba, apesar cu ley ta prescribi esaki. Den practica, el a señala, hopi hende ta print un simbolo pa nan mes y ta pone esaki den nan auto, pero esaki no ta un permiso oficial.

  “Esaki no ta bay segun ley y no tin e structura necesario na unda polis por actua manera mester ta”, Ruiz a expresa.