Na Santa Rosa nan ta hopi contento di a haya un baby baca di raza Jersey

Nathalie Maduro, director di LVV:

• Cualkier persona cu tin un nomber bunita p’e por bay bishita Santa Rosa 

ORANJESTAD (AAN) Nathalie Maduro, Director di Departamento di Agricultura, Cria y Pesca (LVV/Santa Rosa), a duna di conoce den entrevista cu DIARIO, cu nan tin un raza di baca, cu ta e raza Jersey, cual LVV a busca na aña 2022 cu nan a haci un test cu e tipo di raza aki.

   “Nos tabata tin den pasado ‘Carmelita’ cu ta un Holstein, cu na Hulanda tin hopi, cu e proposito p’e duna lechi, pero nan kier a test Jersey, cu ta pa lechi y carni. Ayera nos a haya un baby, y e ta bayendo bon, pero tambe por a mira cuanto lechi e raza di baca aki por produci. Baca na Aruba por tin su challenge, pa motibo cu e ta consumi hopi awa y hopi cuminda, y prijs di cuminda no ta barata”, Nathalie a expresa.

El a agrega cu semper Santa Rosa ta aconseha hende cu kier cuminza cu crianza di baca, pa busca un of dos. Djis pa e wak y haci su calculacionnan di cuanto su gastonan ta bay ta pa luna, wak si di berdad e persona por carga e gasto.

“Por ehemplo, na nos Pop up market, diasabra, nos tabata tin un criador cu a bin bende carni di baca, y por a wak cu consumidornan aworaki ta apreciando e carninan local, nan no tin miedo mas. Corda cu na Aruba nos no ta uza e procesonan di carni cu ta bin di afo. E carni no ta cora bunita, e ta di su color natural. Pero aworaki aki por wak cu tin mas demanda tambe pa carni local, dus e bacanan di nos, nos no ta uza nan pa carni, ta mas bien pa cunukeronan cu tin deseo di cumpra un baca. Aworaki, nos ta bezig cu un onderzoek; nos tin un consultant, y mi ta contento cu nos tin e ayudo di e veterinario Erin Croes, cu tambe a haci un bishita cerca nos, y cu nos por tin’e atrobe manera antes, cu e ta bin controla nos bestianan”, director di LVV a menciona. El a agrega cu nan ta contento cu nan baca; nan no a dun’e nomber ainda. “Si tin cualkier persona cu kier manda un nomber leuk semper a ta bon bini, y si kier pasa bishita nos ‘kinder boerderij’ pa wak e mama, si kier traha un wortel, semper nan ta hay’e dushi. Y si, nos ta hopi contento cu nos baca”, Nathalie a reitera.