ORANJESTAD (AAN): Manera cu DIARIO a trece dilanti caba na comienzo di luna, cu trabao a start bek awor si den Columbusstraat na Playa awor cu e tubonan a yega Aruba.
E proyecto aki ta forma parti di e asina yama ‘Proyecto Wilhelminastraat/Columbustraat’.
DOW a anuncia cu e trabaonan a comienzo di luna. Esaki ta encera cu ta bay coba den caminda, pone tubonan y e cera e bakprofiel bieu y esey mes lo dura 5 siman
Ora finalisa cu e trabao di e bakprofiel bieu, lo sigui cu otro proceso, esta cuminsa cu trabaonan di pone klinkers riba e caminda.
Den e prome siman di September, lo cuminsa cu trabaonan di riolering den Wilhelminastraat sigui pa trabaonan di klinkers. Esey kiermen cu un parti di Wilhelimastraat lo worde cera.
Esaki ta e planning cu contratista a duna nos y ta premira cu e prome siman di October e proyecto por keda cla si no haya ningun contratiempo mas.
E potret aki saca den fin di siman, ta mustra pues cu tin 2 luna mas pa bay pa keda cla. Y DIARIO a bin ta ricibiendo indicacion, cu e comerciantenan den e area ta sinti cu nan negoshi a keda basta perhudica. Nan ta spera cu pa e dos lunanan cu falta, cu lo no ta bay tin mas sorpresa. Nan a hasta desea, cu ohala cu enbes di traha ora normal, traha ora extra, pa caba cu e trabaonan, mas liher posible, ya cu e perdida pa e negoshinan aki ta aumentando diariamente.
