Na Centro di Bario Playa Pabao a celebra Dia Mundial di Refugiadonan

ORANJESTAD(AAN): Recientemente na Centro di Bario Playa Pabao a tene un celebracion pa conmemora e Dia Mundial di Refugiadonan, cu ta wordo celebra tur aña riba 20 di Juni.

Durante un entrevista Irene van Rij, hefe di e oficina nacional UNHCR Aruba, a splica cu riba e fecha ta corda e valentia di refugiadonan y buscadornan di asilo.

Na e celebracion di conmemoracion diferente organizacion tabata presente, mientras cu tabata tin varios stand di diferente pais for di unda diferente refugiado aki na Aruba ta bin.

Na e stands por a haya informacion di e paisnan cu e personanan ta representa.

Van Rij a splica cu UNHCR ta presenta na Aruba desde 2018 y e organizacion ta traha pa e refugiadonan imigrante.

“Nos ta haci esaki principalmente cu e imigrantenan di  Venezuela, pero tambe cu esnan di Colombia y Haiti entre otro”.

Tur hende cu ta pensa cu nan tin e necesidad di haya un asilo, por acerca nos organizacion, segun van Rij.

El a indica cu UNHCR ta traha cu Gobierno pa asegura cu esnan cu tin mester di proteccion internacional, efectivamente tin acceso na esaki.