Na caminda pa celebra 15 aña di e marca local ARUBIANO Awareness Brand

ORANJESTAD (AAN):  Nos Miss Teen Aruba International, Tara Van Der Werk, ta e orguyoso y Brand Ambassador nobo di Arubiano Brand.

E ta representa identidad, balornan, etica, mision y personalidad completo di e awareness brand, y ta bira un bos pa esnan cu no tin un bos — epecialmente nos cacho y pushinan di caya cu merece amor, cuido y proteccion.

Laga nos traha man cu man pa proteha nos amigonan sin bos. Pasobra papia pa nan… ta manera un cambio real ta cuminsa.

Tara ta un fuente di inspiracion, ehempel y motivacion pa e hobennan Arubiano. Tambe, Tara ta traha pa informa y educa riba e importancia di cuida y sterilisa, pa yuda tin bida mas largo y saludabel pa mascotanan, y un comunidad miho pa tur hende.

Arubiano local brand ta super agradecido cu Tara Van Der Werk su entrega y entusiasmo y hunto ta yuda trece mas conscientisacion pa Animal Rights!

E palabranan di Miss Teen Intl, Tara, ora el a wordo introduci como nobo Ambassador Arubiano: "Mi ta hopi contento, mi mes a pidi un pechi di animal rights pa mi cumpleaños toevallig hahaha, y awor e ta mane un soño cu ta bira realidad pa traha cu Arubiano."

Aruba mester ta orguyoso di nos Miss Teen Internacional. Y un gran danki tambe na su mama, Judelca Briceno, pa e confiansa.

Awor, ban uni e dedicacion y pasion cu e mision pa aumenta e conscientisacion contra abuso di animal, haci donacion di mas pechi pa fundraising, y celebra 15 aña di e marca local ARUBIANO Awareness Brand.