Na Aruba tin ocho mil pensionado of mas cu ta biba di 800 Florin of menos

Ivo Valdez, presidente OPPA riba Dia di Adulto Mayor

 *Nan tin cu warda lunanan largo pa haya cita cu specialista 

ORANJESTAD (AAN) Den cuadro di a observa e Dia di Adulto Mayor, diamars 1 di October ci a pasa, e Presidente di OPPA, señor Ivo Valdez, den entrevista cu DIARIO, a expresa cu tin biaha e ta puntra su mes si nos ta celebra e dia aki, of nos ta recorda.

   “Pasobra e situacion di nos grandinan na Aruba no ta cos di gaba, pero nos (OPPA) ta celebra den sentido di tur loke nos grandinan a haci pa nos, pasobra danki na nan, nos tin loke nos tin awendia, y nan a siña nos hopi cos.

   Y net e cosnan bon, nos ta haya cu hopi di nos ta laga pone un banda, anto esey no por. Anto, nan a traha duro pa Aruba su progreso, y tambe a siña nos respet y con pa sigui dilanti.  Pero lamentablemente, esey no ta bay manera nos ta desea. Pakico? Pasobra hopi di nos grandinan ta pasando un bida malo”, Ivo Valdez a señala.

   Valdez ta spera cu nos comunidad y nos gobernantenan bira mas conciente, cu nos mester trata nos grandinan bon, pasobra nan a traha duro pa locual nos tin awe.

“No por t’asina cu nos tin como ocho mil pensionado of mas cu ta biba cu un entrada di 800 Florin of menos. No por! Nan tin cu pasa lunanan largo ta warda pa haya un cita cu specialista, esnan cu ta mas den necesidad ta riba un lista di spera pa nan haya tratamento special, den cas di anciano. No por!” Ivo Valdez a remarca.

   El a agrega cu nos ta gaba cu Aruba ta un isla rico, cu nos tin bon entrada, pero toch nos hendenan ta pasa trabao. Nan mes tin cu paga pa remedinan cu AZV no ta paga. “Esey no por riba un lugar asina conoci mundialmente. Nos ta bisa nos ta ‘one happy island’ pero ken, ken riba e isla aki tin e happiness. Nos no sa!” Ivo Valdez a remarca.

El a subraya cu Aruba tin un entrada grandi, pero e ta desigualmente reparti den e Isla y den esey OPPA kier pa bin un cambio, y esaki mester bin pa nos hendenan grandi, cu merece di worde trata miho.

“Tur dia cu mi haya oportunidad di trece algo den e medionan, mi ta trece esey”, Valdez a enfatiza.