Binti cupo di trabao lo habri pa hobennan na Wardacosta na Aruba

Wardacosta lo cuminsa patruya awanan teritorial di Aruba 24/7

ORANJESTAD (AAN): Diaranson mainta 2 di october Prome Minister Evelyn Wever-Croes a reuni cu Director di Wardacosta di Caribe Hulandes, señor Hansen riba un tema hopi importante di e desaroyo di Wardacosta.

   Wardacosta ta parti di Reino cu ta parti di defensa Hulandes, y nan ta yuda tene frontera di Aruba sigur patruyando e awanan teritorial.

   Durante e reunion Kustwacht Aruba a informa Prome Minister cu nan ta bezig cu un transicion di Kustwacht pa asina nan ta disponibel 24/7, haciendo un control continuo di e awanan teritorial di Aruba. Akinan e mandatario a indica cu esaki ta algo grandi pa Aruba y Gobierno ta bin ta pidi esaki desde hopi tempo.

   Cu esaki a bin otro bon noticia tambe. Pa motibo di e transicion aki, na Aruba lo habri 20 cupo di trabao cerca Kustwacht y esaki ta un bon oportunidad pa hobennan na Aruba cu semper tabata interesa den un carera asina. Durante e reunion Kustwacht a entrega tur loke tin di haber cu e documentacion di e transicion na Gobierno di Aruba y pa banda di Gobierno e siguiente paso ta busca e consehonan necesario riba esaki y asina aproba y ratifica e acuerdonan.

   “Cu esaki e 20 cuponan di trabao por habri y hobennan di Aruba mes lo por yuda cu control y patruya di nos awanan teritorial 24 ora pa dia, 7 dia pa siman. E siguridad di nos frontera ta algo di preocupacion grandi y creciente pero mi tin tur confianza cu e ampliacion aki di patruya y control lo yuda nos tene nos frontera y pais mas sigur”, Prome Minister a expresa.