Na Aruba mes lo bay recicla boternan di glas den panchi di dak

Proyecto inovador na San Nicolas

ORANJESTAD (AAN): E compania Arupro cu tin su sede na San Nicolas, un tiki patras di ex-planta di Victoria Bottling Company, ta ya bon conoci pa su amplio variedad di producto cu e ta ofrece.  Hasta durante e comienzo di pandemia, nan a yuda Aruba grandemente ofreciendo Handsanitizer ora cu esakinan a bira scars riba e isla.

   Como cu nan ta usando hopi boter di plastico pa nan productonan, e compania a mustra interes den haci algo cu reciclahe di plastico.  Ya caba nan tin un Plastic Recycle Center unda cu envez di benta plastico afo, bo ta hiba nan eynan y nan ta paga 10 cent pa cada kilo di plastico.

   E propietario Andres Hernandez ta contento pa anuncia cu e compania tin algun proyecto preparando pa sigui yuda den e proceso pa reduci desperdicio di plastico na Aruba y den region.  Riba paginanan mas dilanti por a lesa caba con e proyecto di converti Plastico den Diesel fuel ta hayando un push enorme, awor cu e compania a haya espacio mas amplio pa funciona aden.

   Proyecto di panchi di dak: Segun Andres Hernandez, e otro proyecto cu nan ta preparando pa bin cune, ta un planta unda ta bay recicla y procesa boter y demas productonan di glas, y ta converti nan den Panchi di Dak.

   E proyecto di Panchi di Dak lo ta uno planea pa aña 2023, y aki ta unda nan lo bay tin mester di boter di glas, pa asina converti esaki den santo silica, y converti esaki den Panchi di Dak cu calidad internacional.

   Varios lugar rond mundo ya ta trahando den e tipo di Panchi di Dak aki, cu ta wordo yama ‘Eco tiles’.  Nan ta wordo produci danki na plastico y glas recicla, cu ta bira Panchi di Dak cu ta eco-friendly, ta spaar bo hopi placa, nan ta duradero, ta resistente na schimmel (‘mold’), y nan ta laga bo cas mustra hopi bunita mes.  Y ademas e Panchinan di Dak aki tambe, na final di nan bida tambe ta 100% reciclable.

   E Panchinan di Dak aki ta mas duradero, ta mas liviano, y mas facil pa transporta y instala, compara cu esnan fabrica di concrete of di klei.

   E plan aki di Arupro no ta djis yuda Aruba keda mas limpi, pero e lo bay impulsa hopi hende pa subi caya pa bay recoge boternan di e.o. juice y cerbez cu bo ta haya aworaki benta tur caminda, den rooi, y mey-mey di mondi.

  Fuera di esey, e proceso di Panchi di Dak aki produci na Aruba mes, lo bay yuda reduci e prijsnan astronomico di material di construccion aworaki riba e isla.