ORANJESTAD (AAN): Famianan di seis venezolano kendenan desde 4 di Mei 2022 a subi lama pa bay Pisca y nunca mas a regresa, ta pidiendo yudanza awor te na Colombia pa check si Guardacosta Colombiano por duna un man.
Famia di e tripulantenan di e boto di pisca a bay La Guajira na Colombia pa check si acaso autoridad por a haya algo eynan, pasobra nan tin 36 dia caba sin cu nan a haya ningun noticia di nan paradero, ni por comunica cu nan.
E boto a sali dia 4 di Mei 2022 for di e pier di Las Piedras na peninsula di Paraguana cu seis tripulante abordo, di cual 5 ta bin di mesun famia piscador. Cuatro dia despues nan a stop di comunica cu e famia.
Awor nan ta pidi solidaridad di prensa, di e piscadornan den e zona, pa nan ta extra vigilante. Pasobra nan sa cu cualkier boto cu drief sali di golfo Venezolano, ta wordo lastra pa coriente y yega te na peninsula di La Guajira.
E boto cu e nomber ‘Santo Amaro II’ a sali riba lama pa un viahe di 12 dia, cu tur permiso y revision necesario, pero te cu awe ainda no a tende nada mas di nan.
Nan ta hendenan cu ta subi lama pa asina alimenta nan famia, y pesey nan ta pidi autoridadnan maritimo na Colombia pa yuda nan cu informacion y buskeda. Segun e famia, den ultimo 30 dia a registra un total di 8 incidente cu botonan Venezolano, debi na e lama bruto cu tin. Algun tabatin suerte y a logra regresa, pero otronan manera e barco Arcangel Miguel cu a sink bay abao cu 6 persona.
