Na Aruba a hisa un Fli gigantesco cu por genera 100kW di coriente

Exitoso test haci na Vader Piet - ORANJESTAD (AAN): E compania Hulandes “Kitepower Airborne Wind Energy” hunto cu Defensa Hulandes, a tuma pasonan pa asina yuda cu energia sostenible den Caribe.

   Recientemente na Aruba, e compania hunto cu Defensa Hulandes a hisa nan Fli special cu yama ‘Falcon 100kW’ y esaki tabata riba e tereno di tiro na Vader Piet.

   Falcon 100kW ta e prome sistema di energia di biento mobil cu ta zweef den halo.  E Fli gigantesco aki a wordo hisa como test.

   Unavez cu e Fli aki bay halto, e por genera coriente for di biento y di e forma ey e ta bira un fuente sostenible di energia.

   E cooperacion entre Defensa Hulandes y Kitepower a start na aña 2016, ora cu e compania Kitepower a gana e Competencia di Inovacion organiza pa Defensa Hulandes.

   Desde e tempo ey, Kitepower y Defensa a sigui colabora y traha hunto riba e concepto y esey a yega asina leu cu recien nan a bin cu e Fli gigantesco te na Aruba y a test esaki riba e tereno di tiro cerca di Vader Piet na Aruba.  Ora el a bay halto, el a cuminza produci coriente danki na biento.

   E posicion na Vader Piet ta ideal pa biento constant, y pesey el a bira e sede pa Kitepower haci test cu sosten logistico y tecnico di Defensa Hulandes.

   Caribbean Engineer: E actividadnan di Kitepower na Aruba ta forma parti tambe di un training keto bay andando di Caribbean Engineer.  Den e training aki, e ingenieronan di e 101 Geniebataljon Phoenix OOCL a sostene Kitepower den e logistica (por ehemplo con pa transporta e sistema di Hulanda pa Aruba), y e tecnologia (por ehemplo haciendo reparacion).  Ademas ta intercambia conocemento entre e ingenieronan militar y Kitepower.

   DIARIO a haya sa cu Marinierskazerne Savaneta tambe ta apoya e actividadnan di e proyecto aki di sostenibilidad, por ehemplo den materia di logistica.

   Pa Savaneta, e colaboracion ta bin net bon mirando e hecho cu nan tin ambicion grandi pa introduci ambicionnnan di sostenibilidad.  Diabierna siman pasa mes, Marinierskazerne Savaneta a organiza un Encuentro cu Kitepower, unda un cantidad di socio na Aruba a bay tira un bista cu e actividadnan di Kitepower na Vader Piet.

   Tur hende a keda impresiona pa mira e Fli gigantesco metalico bulando den halto, y generando coriente.  Imaginabo hopi di nan bulando pareu ta genera coriente.