Na 2022 tabatin 4% mas pasahero aereo pa islanan BES

ORANJESTAD (AAN): Informacion procedente di Bonaire, ta indica cu na 2022, mas cu 475 mil pasahero a bula pa y for di e aeropuertonan di Bonaire, Saba y St. Eustatius.

Esaki ta casi 64 porciento mas cu na 2021 y 4 porciento mas cu na 2019. E cantidad di avion cu a bula di y pa e aeropuertonan aki tabata casi 14 porciento mas halto cu na 2021. Esaki CBS ta informa a base di cifranan nobo.

   Den Juli y December 2022 mayoria di pasahero a bula di y pa e tres aeropuertonan di Hulanda Caribense: 45 mil den ambos luna. Diasabra 19 di Februari tabata e dia mas druk. E dia ey 2,5 mil pasahero a pasa via e terminalnan di Flamingo Airport na Bonaire, F.D. Roosevelt Airport na St. Eustatius of Juancho E. Yrausquin Airport na Saba.

   Mayoria pasahero ta bula for di y pa Bonaire: Na 2022 casi 432 mil pasahero a baha na of a sali for di Flamingo Airport na Bonaire; esaki ta 91 porciento di tur pasahero na Hulanda Caribense. Pa e aeropuertonan di Sint Eustatius y Saba tabata respectivamente 5 y 4 porciento. E pista di aterizahe di Flamingo Airport na Bonaire tin tres kilometer di largura, y esaki ta permiti avionnan mas grandi ateriza. E pistanan di aterizahe na Saba y Sint Eustatius ta mas cortico, pues pa esaki ta bula cu avionnan mas chikito riba e islanan aki.

   Crecimento mas grandi den cantidad di pasahero aereo na Bonaire: En comparashon cu 2019 e aña pre-Covid, tabatin 4 porciento mas pasahero na 2022 cu a biaha for di y pa e islanan di Hulanda Caribense. Tur e pasaheronan extra aki a biaha for di y pa Bonaire: for di 384 mi pasahero na 2019 pa 432 mi na 2022, un estrecho di mas cu 12 por ciento. E cantidad di buelo di y pa Bonaire tabata hopi mas abao cu e nivelnan di 2019.

   Mas buelo for di y pa Saba: Na aeropuertonan di Sint Eustatius y Saba hunto mas cu 8.6 mil buelo a keda ehecuta na 2022. Esaki tabata 44 porciento di tur e buelonan di y pa Hulanda Caribense y 16.4 porciento mas cu na 2021. Juancho E. Yrausquin Airport na Saba tabata e unico di e tres aeropuertonan na Hulanda Caribense unda e cantidad di buelo na 2022 a subi compara cu na 2019.

   For di Saba y Sint Eustatius mayoria di buelo ta sali y yega for di Sint Maarten. Tantu na 2019 komo na 2022, mayoria di buelo di y pa Bonaire tabata for di Curacao y Amsterdam; respectivamente 84 porciento y 78 porciento di e buelonan. Mayoria di buelo for di e aeropuertonan di Saba y Sint Eustatius hunto ta bay y bini for di y pa Sint Maarten, na 2022 esaki tabata 83%.

   Aeropuerto Bonaire na 2022 di cuater aeropuerto di Hulanda: Na Flamingo Airport na Bonaire a ehecuta mas cu 11.2 mil vuelo na 2022. Bonaire ta na di cuater luga riba e aeropuertonan Hulandes despues di Amsterdam Airport Schiphol, Eindhoven Airport y Rotterdam The Hague Airport. Esaki ta conta tambe pa e cantidad di pasahero transporta.