Famia desespera ta busca ayudo pa nan yiu homber

ORANJESTAD (AAN): Den un caso sumamente lamentabel, un hoben di apenas 22 aña di edad ta desespera pa recupera su salud y hiba un bida mas humano.

Su mayornan Sra Mirla Diaz y Tata (di criansa) Norwin Leito, a bati na porta di prensa y durante un entrevista den e programa Bon Dia Aruba cu Erin Croes, nan ta pidiendo un sosten pa yuda nan yega Hulanda cu nan yiu Norbert Noel Leijdsman.

Nobert di su cinco aña di edad ta sufri di Diabetes tipo 1. Esaki ta nifica cu e mester ricibi insulina diariamente. Fuera di cu Norbert tin diabetes cronico, e tin limitacion intelectual tambe, loke por causa comportacion problematico pa su mes y su mayornan. Mayornan a conta cu nan a yega di acudi na varios instancia pa yuda nan yiu, pero sin resultado. Nan a acudi na Sociale Zaken, AZV, pero semper a ricibi como contesta cu no tin un e cuido medico ni specialisa pa trata nan yiu Norbert. Norbert mester di e guia socio emocional, pues su salud fisico y mental.

Dr Waterloo kende ta su internista, a informa tanto e Mama como e hoben cu aki na Aruba no tin lugar p'e. A informa nan tambe cu na Hulanda tin varios instituto of centrum cu por asisti y yuda e hoben aki. Si e hoben keda den e estado cu e ta, e por asta yega na su morto, ta loke mediconan a informa e famia. Nan ta biba di onderstand kiermeen ta riba poco finansas cu nan ta ricibi nan tin cu maniobra cu no ta un bida sano pa ningun hende. Debi na su situacion frustrante hopi biaha Norbert ta bira desespera y ta un menasa pa su propio bida y di su famia.

E ta un situacion bastante desesperante cu mester di ayudo y atencion prome cu ta laat. Nan ta desea di yega Hulanda mas pronto cu ta posibel pa por ricibi e ayudo y asistencia rekeri pa e hoben.

-Con por yuda

Esnan cu ta desea di duna un man, por yuda nan sea cu compra di pasashi, o otro tipo di yudansa ta mas cu bonbini. Nan lo desea di por yega y hiba Norbert Hulanda, pa e por yega na un centrum cu por atend'e y yud'e inmediatamente.

Ta haci un peticion na tur instancia cu ta na altura di e situacion di e famia pa yuda nan yega Hulanda. Por tuma contacto cu telefoon 5644857 cual ta number di Norwin Leito cu ta e tata di criansa. Cada yudansa lo ta mas cu bonbini y hopi aprecia.