WILLEMSTAD: Tabata den oranan di merdia, cu e capitan di e catamaran Black & White a bati alarma na Wardacosta di Caribe Hulandes,
pa bisa cu un turista femenino a bira diripiente basta malo riba e isla Klein Curaçao.
A base di e informe, y combersacionnan cu esnan di e Catamaran, e Centro Operacional Maritimo (MOC) di Wardacosta a dicidi cu ta mihor pa manda un helicopter pa e isla, pa asina busca e turista.
E helicopter a lanta vuelo y mesora a acudi pa e isla, unda nan a bay cu e turista femenino, y un miembro di famia di dje, y asina a sali rumbo pa Aeropuerto di Hato na e isla, unda un Ambulans tabata cla pa ricibi’e y bay cune pa Hospital.
No ta conoci con a para cu e salud di e turista, pero Wardacosta ta desee pronto recuperacion.
E isla di Klein Curaçao ta basta grandi. Di largura, e ta similar cu bo ta para na e rotonde di Santa Cruz, y e final ta te banda di e tanki di awa di WEB na Mondi Fierno. Di hanchura e ta igual for di rotonde di Santa Cruz bay pabao te Canashito Farm Supply.
