Musica di Michael Lampe ta zona den prestigioso Battery Dance Festival na New York

ORANJESTAD (AAN):  Compositor, productor y artista multidisciplinario y Embahador Cultural di Aruba, Michael Lampe,

lo tin su musica presenta den e prestigioso Battery Dance Festival na New York City, como parti di un coreografia di choreographer di Curaçao Faizah Grootens.

E festival, cu ta tuma luga for di 10 pa 16 di augustus 2025, ta un di e eventonan cultural di temporada aki mas importante den New York, cu ta atrai miles di hende y un audiencia global via streaming. E seleccion di e obra di Faizah, acompaña cu musica original di Michael Lampe, ta un paso importante pa representacion di talento di Caribe den un escenario internacional tan reconoci.

Tocante e obra

E coreografia di Faizah Grootens ta un exploracion di identidad, memoria y movimiento, cu e a integra cu un composicion musical di Michael Lampe. E musica ta fusiona di ritmonan di Caribe cu texturanan electronico toca cu instrumentonan clasico, creando un dialogo profundo entre movimiento y sonido.

Michael Lampe tocante e colaboracion:
“Ta un gran honor di traha cu Faizah y pa nos trabounan Caribense ta briya na un festival di taya mundial. E ta mas cu un presentacion – e ta un acto di representacion cultural y un brug pa nos historia y creatividad.” Momentonan asina ta habri caminda pa mas di nos talentonan di Aruba y Caribe tambe haya oportunidadnan internacional. Esaki ta algo cu mi ta lucha pe incansablemente.

E presentacion lo tuma luga di 12 pa 16 di augustus na Rockefeller Park NYC y lo ta transmiti online pa un publico global www.batterydance.org/battery-dance-festival

Tocante Michael Lampe

Michael Lampe a studia Hogeschool voor de Kunsten Utrecht y recientemente a gradua cu un Executive diploma di United Nations riba tereno di Diplomacia Cultural, Lampe ta un compositor, productor y artista multidisciplinario di Aruba, activo tambe bou di nombernan Fellow y Datapanik, cu su obranan musical e ta crea brug entre diferente generacion cu mescla di musica electronico, influencia di folklore di Aruba y Caribe, tecnologia y investigacion di herencia cultural. Den pasado a toca na varios pais y festivals. Lampe ta tambe Ambassador y Diplomatico Cultural di Aruba cu base na Hulanda, e ta dedica na crea oportunidadnan internacional pa nos talentonan di Aruba. 

Tocante Faizah Grootens

Faizah Grootens ta un choreographer y bailarin di Curaçao cu a studia na Cuba y cu ta combina baile contemporaneo cu influencia Caribense y temanan di identidad, diaspora y transformacion. Su trabaou a wordo presenta den escenario internacional y e ta un voz importante den baile contemporaneo di region.

Tocante Battery Dance Festival

Battery Dance Festival, funda den 1982, ta e evento di baile mas largo na New York City, cu ta invita mas cu 350 compania y artista di mas cu 90 pais. E ta un plataforma crucial pa intercambio cultural y pa promove diversidad artistico na nivel global.