ORANJESTAD (AAN): Un di e aspectonan interesante di e proyecto di 'mapping' di e Industrianan Cultural y Creativo di Aruba pa
cu diversificacion economico ta e habilidad pa no solamente posiciona e sector cultural y creativo como un sector separa, pero como un motor tambe pa yuda fortifica Aruba su posicion como destinacion turistico. E meta ta pa cada sector tin un rol complementario, y cu un vision integra.
Aruba ta na un crusada entre creatividad y turismo, cu por sostene e isla su crecemento sostenibel y mas resiliente na ‘shock’ externo, manera por ehempel un pandemia. Ta di remarca cu por nota varios inicitiava, pero ainda ta falta di implementacion centralisa segun un vision integra. Mientras cu Turismo ta un sosten grandi y tambe ta beneficia grandemente di e sector, e sector creativo y cultural por tin un balor agrega cu ta autentico, cu no por wordo replica pa otro destinacion.
Na final di dia creatividad y cultura ta brinda experencia turistico basa riba loke ta local, contenido humano, y educativo. Aruba tin e oportunidad pa posiciona su mes den un mercado global satura. Pa Aruba por logra esaki, e relacion entre turismo y e sector cultural y creativo su structuracion mester continua basa riba planificacion segun termino corto y largo. Pero mas ainda e mester wordo sosteni na nivel gubernamental, academico y comercial. Sin un sistema cu ta guia e integracion, oportunidadnan ta keda solamente na oportunidad sin accion.
