Minister Wendrick Cicilia:
ORANJESTAD (AAN) – Minister di Labor, Wendrick Cicilia, a sigui splica den entrevista cu DIARIO, cu algun siman pasa el a anuncia cu nan a entrega, na e Departamento di Inspeccion Laboral, cu tin e tarea di reinforsa cumplimento di e leynan laboral, un documento di 20 punto di cual e kier mira ahustenan.
E mandatario a bisa cu na fin di luna e mester haya un plan di Arbeids Inspectie di con nan ta bay implementa esaki.
“Tambe nos a agrega un hurista, pa atende cu e parti di reinforsa e parti di ‘handhaving’, pa locual ta den e ley aki tin e posibilidad pa impone un multa administrativo”, el a indica.
El a reitera cu den e caso aki nan tabata tin mester di un hurista pa por guia e proceso aki, y den esaki tambe a duna autorizacion pa habri un vacante. Esaki pa sostene e parti di inspeccion laboral y a pidi tambe atencion special riba un proyecto hopi specifico riba supervision y a pidi pa esnan cu ta traha den e sector uitzendbureau y uitzend branch, cu ta un sector di riesgo, atencion special.
“Pero tambe loke nos kier haci ta expande hunto cu mehora y eleva e servicio, ta presencia di e Departamento di Labor den nos barionan, y den MFAnan con nos por acomoda diferente locket, pa ta mas accesibel pa nos comunidad, pa ta mas cerca pasobra nos sa cu tin diferente persona, por ehemplo cu ta biba den San Nicolas, cu tin cu bin te na Playa y ora e yega Departamento di Labor ta haya cu na e momento ey nan no ta atendiendo publico”, e dignatario a comenta.
El a reitera cu e kier mira mas presencia di e departamento den e barionan y mas cerca di nos comunidad, pero nan ta haciendo esaki pa eleva e calidad di servicio y conseho riba un base huridico pa empleadonan sinti nan mes proteha, ora cu nan tin un disputa laboral cu nan doñonan di trabao.
