"Mundo ta digitalisando hopi lihe y nos como hende muher no por keda atras"

Miss Aruba, Kiara Arends:

ORANJESTAD (AAN):   Durante un actividad special pa hende muher na Universidad di Aruba, Kiara Arends, kende a caba di representa e isla den e concurso di Miss Universe, el a bisa cu e ta hopi contento di por a comparti e momento aki cu Prome Minister Evelyn Wever-Croes.

            El a enfatisa cu empoderamento di hende muher ta un tema cu a haya hopi importancia rond mundo y ta algo cu ta sigui. "Nos ta wak cu innovacion y tecnologia ta puntonan importante den un mundo cu ta digitalisando hopi lihe. Anto nos como hende muher no por keda atras", Arends a expresa.

            Un manera pa hende muher no keda atras ta cuminsa cu tecnologia y innovacion ya cu unabes cu tin tecnologia tin acceso na diferente plataforma cu por yuda nos educa nos mes tambe. Si e tecnologia aki wordo comparti cu mas hende muher na Aruba y rond mundo, por wak cu ta haya mas acceso tambe y ta bay tin mas seguridad y pa alcansa e hendenan cu mester na e plataformanan cu mester, a bisa.

            A agrega cu tambe cu ta wak cu tin hopi beneficio door di tin acceso na tecnologia.

            Kiara Arends a studia Ley na Universidad di Aruba y e parti di derechonan humano e ta kere cu ta algo hopi importante. Igualdad di hende muher ainda falta. E ta kere cu como abogado, cual ta e profesion cu e kier bay eherce, e lo por yuda defende hende muhernan cu ta bay tin necesidad di esaki na Aruba.

            "Banda di esey mester trece conscientisacion tambe tocante di derechonan cu nos tin como hende muher", Kiara a expresa.