Minister Endy Croes a elabora tocante renegociacion di contrato nobo entre Lotto y CBN

ORANJESTAD (AAN) – Na Fundacion Lotto pa Deporte, a tuma lugar e conferencia di prensa yama pa Minister di Enseñanza y Deporte, señor Endy Croes, relaciona cu e renegociacion di un contrato nobo cu Canadian Bank Note y Lotto pa Deporte.

Prome cu e dignatario a hiba palabra, a pasa un video unda ta mustra cu Lotto a wordo lanta na 1982 cu e idea di genera fondo pa deporte. Tocante esaki Minister Croes a menciona cu desde e tempo ey caba, gobiernonan tabata tin problema pa haya fondo pa destina, directamente, pa deporte.

Papiando un tiki di historia di Lotto, e mandatario a comenta cu ora a tume over, na September 2021, su Colega Dangui Oduber a pidie pa nan pidi pa nan negocia un miho contrato pa Aruba y su deporte.

Esaki pasobra nan tabata tin e sentimento cu e fondonan di Lotto no tabata yega na su destinacion, manera cu mester ta. “Nos tabata tin e sentimento y nos a prueba esaki tambe cu rapport riba mesa, cu gran parti di e fondonan a bay pa otro destinacion, y mas cu claro, tur negoshi cu firma un contrato tin derecho pa haci negoshi. Pero den e caso aki, e plata di Lotto mester keda destina pa nos deportistanan”, Minister Endy Croes a remarca.

El a agrega cu den e leynan hopi aña bieu (desde aña 1909) a mira cual tabata e intencion di un loteria. Y den e Memorie van Toelichting 1909, ta para hopi cla cu e “matschappelijk entiteid” mester wordo skirbi. Pues, cu e entidad social mester wordo skirbi y den e ley di e tempo ey caba e pensamento tabata cu loteria na beneficio di e pais y no solamente pa un grupo of un compania, haya e “fair share” di mas grandi.

Minister Endy Croes a señala cu, cu e ideanan aki a tuma contacto cu CBN (Canadian Bank Note) desde cu su persona a bira minister cu Gabinete Wever-Croes 2 y minister Oduber tambe tabata tin su contactonan, y a cuminza canaliza e caminda cu re-negociacion  di contrato nobo.

E mandatario a señala cu nan punto di bista tabata cu nan conoce CBN y cu e ta traha pa mas cu 70 gobierno rond mundo, y nan tin respet cu esey tambe.

“E unico manera cu nos kier sinta y haci un kennis maken y combersa, ta si tin e tema di renegocia, cu un contrato nobo na beneficio di Lotto y e deportistanan. Esaki a tuma lugar, nan a bay di acuerdo y a bin  Aruba y cuminza e combersacionnan”, e mandatario a bisa.

E mandatario a recorda cu na Luna di Juli, gobierno di Aruba a participa cu e team di Canadian Bank Note y e bestuur di Lotto pa Deporte, y su conseheronan (un team di siete) y a yega na un MOU, den e cuadro cu Aruba lo renegocia un contrato nobo.