Barco Colombiano a sali rumbo pa Aruba cu 20 ton di fruta abordo

Acto historico pa e zona exportador aki di Colombia

RIOHACHA: Den fin di siman cu a pasa, tabatin un operacion grandi na waf di Puerto Nuevo, na departamento di Alta Guajira di Colombia, den area di municipio Uribia.

   Esey ta debi cu e prome barco a bandona Puerto Nuevo rumbo pa Aruba, carga cu como 20 ton di fruta.

   E portal Guajiranews.com a splica cu e exportacion aki lo bay genera un impacto positivo pa e economia den municipio di Uribia, Maicao, y Manaure, principalmente pa tur e indigenonan wayuu di e zona aki di Alta Guajira cu ta dedica na comercio y actividadnan na e waf.

   Nan a haya e bon noticia aki na luna di Januari cu a pasa, despues di un reunion cu entidadnan di orden nacional, entre nan DIAN y Pensoport (Sociedad Portuario di e Peninsula), unda a confirma cu Puerto Nuevo lo habri bek na Alta Guajira, pa asina cuminza exporta di eynan.

   E informacion a wordo confirma riba social media pa e conocido influencer Aja Ware, kende a bisa cu e prome barco cu 20 ton di fruta a sali pa Aruba.  Cu e acontecimento historico aki, ta activa bek e economia di exportacion pa Caribe despues cu esaki a stop pa mas di 10 aña di inactividad.

   Nan ta reconoce e iniciativa di e comerciante wayuu Pedro Iguarán kende ta e motor tras di tur esaki pa asina habri bentana pa e intercambio comercial cu Aruba, y desaroyando asina e region ey di Colombia.

   E prome barco cu a sali di Colombia pa Aruba carga cu e 20 ton di fruta aki tabata ‘The Tiger’.   Potretnan cortesia Aja Ware y Guajiranews.